Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 135 Hüküm no: 90 Orijinal metin no: [22b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Said Ağa’nın yarısına sahip olduğu evdeki payını ortağı es-Seyyid Ahmed Ağa’ya satması Husûs-ı âti’l-beyânın mahallinde ketb u tahrîri için savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi medîne-i Hazret-i Ebî Eyyüb el-Ensârî -[aleyhi] rahmetü rabbihi’l-bârî-’de Cezerî Kasım Paşa Mahallesiʼnde sâkin fahrü’l-akrân Mehmed Necib Efendi’nin sâkin oldukları menzile varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i Nebevî ettikde medîne-i mezbûrda Selâhi Mehmed Bey Mahallesiʼnde sâkin Said Ağa b. el-merhûm İbrahim Efendi meclis-i ma‘kūd-ı mezkûrede işbu râfiʻü’l-kitâb es-Seyyid Ahmed Ağa b. es-Seyyid Mehmed mahzarında ikrâr-ı tâm ve takrîr-i kelâm edip sâlifü’z-zikr Selâhi Mehmed Bey Mahallesiʼnde vâki‘ iki tarafdan kayyım meşrûtası menzili ve bir tarafdan mekābir-i Müslimîn ve taraf-ı râbiʻi tarîk-i âm ile mahdûd fevkānî iki bâb oda ve bir sofa ve bir dehlîz ve bir kenîf ve bir mağsel ve abdesthâne ve tahtında bir sagīr oda ve bir matbah ve bir kenîf ve bir biʼr-i mâ ve bir mikdâr bağçeyi müştemil mülk menzilin nısfı benim şirâen mülküm olup ve nısf-ı âharı merkūm es-Seyyid Ahmed Ağa’nın mülkü olmağla sâlifü’z-zikr menzil-i mahdûd-ı mezkûrda olan nısf hissemi tarafeynden îcâb ve kabûlü hâvî ve şürût-ı müfsideden ârî bey‘-i bâtt-ı sahîh-i şer‘î ile mezbûr es-Seyyid Ahmed Ağa’ya iki yüz altmış guruşa beyʻ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl ve kabz eylediğinden sonra semen olan meblağ-ı mezbûr iki yüz altmış guruşu merkūm es-Seyyid Ahmed Ağa yedinden bi’t-tamam ahz u kabz eyledim, baʻde’l-yevm menzil-i mahdûd-ı mezkûrda olan nısf hissem merkūm es-Seyyid Ahmed Ağa’nın mülk-i müşterâsı ve hakk-ı sırfı olmuşdur, keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î vâki‘ hâli mevlânâ-yı mezbûr mahallinde ketb u tahrîr, ba‘dehû ma‘an baʻs olunan ümenâ-i şer‘le meclis-i şer‘a gelip herbiri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’l-âşir min-Recebi’l-ferd li-sene semân ve hamsîn ve mi’e ve elf. Şuhûdü’l-hâl: Abdülcelil Bey [b.] el-merhûm Mehmed Efendi, Musa Bey b. Ebûbekir, Mehmed Çelebi [b.] el-Hâc İbrahim, Ahmed Çelebi [b.] el-Hâc Abdurrahman, Mustafa Halil b. Hüseyin.