Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 136 Hüküm no: 91 Orijinal metin no: [22b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmühani’nin İslambey Mahallesi’ndeki evini Hanife Hatun ile kocası Mehmed Beşe’ye satması Medîne-i Hazret-i Ebî Eyyüb el-Ensârî -radiye anhu rabbihi’l-bârî-’de İslambey Mahallesiʼnde sâkine olup zâtı ta‘rîf-i şer‘î ile mu‘arrefe olan Ümmühani bt. Hüseyin nâm hatun meclis-i şer‘-i hatîr-i lâzımü’t-tevkīrde kendi tarafından asîl zevcesi Hanife bt. Ahmed nâm hatun tarafından tasdîka sâbitü’l-vekâle vekîli olan işbu bâ‘isü’l-kitâb Mehmed Beşe b. Mehmed nâm kimesne mahzarında ikrâr ve takrîr-i kelâm edip akd-i âtî sudûruna değin yedimde mülküm olup mahalle-i mezbûrede vâki‘ etrâfı es-Seyyid Ali ve es-Seyyid Mehmed ve Halil mülkleri ve tarîk-i âm ile mahdûd bir bâb fevkānî oda ve iki bâb tahtânî oda ve bir kenîf ve zât-ı eşcâr-ı müsmire ve gayr-ı müsmire bağçeyi müştemil mülk menzilimi tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile seksen guruşa müvekkile-i mezbûre Hanife Hatun ile zevci vekîl-i mezbûr Mehmed Beşe’ye ale’l-iştirâki’s-seviyy beyʻ ve temlîk ve teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezbûr seksen guruşu mezbûr Mehmed Beşe bana bi’l-asâle ve bi’l-vekâle def‘ ve teslîm, ben dahi yedinden tamamen ahz u kabz eyledim, baʻde’l-yevm menzil-i mahdûd-ı mezkûrda benim katʻâ alâka ve medhalim kalmayıp müvekkile-i mezbûre Hanife Hatun ile zevci vekîl-i mezbûr Mehmed Beşe’nin iştirâk-i seviyy üzere mülk-i müşterâları olmuşdur, keyfe mâ yeşâʼân ve yahtâr[ân] mutasarrıf olsunlar dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’r-râbiʻ aşer min-Recebi’l-mürecceb li-sene semân ve hamsîn ve mi’e ve elf. Şuhûdü’l-hâl: Mehmed Said Efendi b. İbrahim, Mukayyid Ömer Efendi b. Osman, Süleyman Efendi b. Abdullah, Ahmed Efendi b. Mustafa, es-Seyyid Mehmed b. Yusuf, es-Seyyid Mustafa [b.] Derviş, Mahmud b. Mustafa, Hasan Beşe b. Mehmed, el-Hâc Hasan b. Şaʻban ve gayruhum.