Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 137 Hüküm no: 92 Orijinal metin no: [23a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dergâh-ı âlî yeniçerilerinden Hafız İbrahim Odabaşı’nın hayatta iken vasiyetini yerine getirmek üzere İsmail Efendi’yi vasi tayin etmiş olduğu Husûs-ı âti’l-beyânın mahallinde istimâ‘ ve tahrîri için savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Zal Paşa Medresesi’nde sâkin Dergâh-ı âlî -dâme mahfûfen bi’l-maʻâlî- yeniçerilerinin yirmi altıncı cemâʻat odası mütekāʻidlerinden olup bundan akdem vefât eden Hâfız İbrahim Odabaşı b. Ali’nin hayâtında sâkin olduğu odaya varıp zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî ettikde müteveffâ-i mezbûrun ber-vech-i âtî vasiyy-i muhtârı olduğunu iddiʻâ eden medrese-i mezbûrun muʻîdi işbu bâ‘isü’l-kitâb İsmail Efendi b. Veli meclis-i ma‘kūd-ı mezkûrda mahmiye-i İstanbul’da yeniçeri beytülmâlını kabza meʼmûr olan fahrü’l-akrân Hasan Ağa b. Abdullah tarafından vekîl-i sâbitü’l-vekâlesi olup tereke-i müteveffâ-i mezbûra vaz‘u’l-yed eden Hüseyin Ağa b. Ahmed mahzarında üzerine da‘vâ ve takrîr-i kelâm edip müteveffâ-i mezbûr Hâfız İbrahim Odabaşı b. Ali b. Abdullah fevtinden on gün mukaddem ben bi-emri’llâhi te‘âlâ vefât eylediğimde mecmû‘-ı terekem ve zimem-i nâsda olan hukūkum ahz u kabz olunup sünnet-i seniyye üzere techîz ve tekfînim görülüp düyûn-ı müsbetem edâ olundukdan sonra bâkī kalan terekemin sülüsü ifrâz ve sülüs-i mezbûrdan bin akçe ile ıskāt-ı salâtım olunup fukarâya verile ve bin akçe ile dahi eyyâm-ı mu‘tâde tabh-ı taʻâm ve itʻâm-ı fukarâ oluna ve sülüs-i mezbûrdan her ne bâkī kalırsa vücûh-ı hayra harc u sarf oluna ve sülüsân-ı terekemi dahi Amasya kasabasında sâkine li-ebeveyn kız karındaşım Fâtıma Hatun’a îsâl oluna deyü vasiyyet ve tenfîzine huzûr-ı Müslimîn’de beni vasiyy-i muhtâr nasb u ta‘yîn edip ben dahi ber-vech-i muharrer vesâyet-i mezbûreyi muvâcehesinde baʻde’l-kabûl mezbûr Hâfız İbrahim Odabaşı musırran alâ-îsâʼihî fevt olmağla tenfîz-i vesâyâ murâd eylediğimde vekîl-i mezbûr Hüseyin Ağa mâni‘ olur, suâl olunsun dedikde gıbbe’s-suâl ve’l-inkâr müdde‘î-i mezbûrdan müddeʻâsını mübeyyine beyyine taleb olundukda udûl-ı ahrâr-ı ricâl-i Müslimîn’den medîne-i mezbûrede sâkin el-Hâc Ahmed Efendi b. Abdurrahman ve el-Hâc Ali Efendi b. Hasan nâm kimesneler li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka müteveffâ-i mezbûr Hâfız İbrahim Odabaşı b. Ali b. Abdullah fevtinden on gün mukaddem ben bi-emri’llâhi te‘âlâ vefât eylediğimde mecmû‘-ı terekem ve zimem-i nâsda olan hukūkum ahz u kabz olunup sünnet-i seniyye üzere techîz ve tekfînim görülüp düyûn-ı müsbetem edâ olundukdan sonra bâkī kalan terekenin sülüsü ifrâz ve sülüs-i mezbûrdan bin akçe ile ıskāt-ı salâtım olunup fukarâya verile ve bin akçe ile dahi eyyâm-ı mu‘tâde tabh-ı taʻâm ve itʻâm-ı fukarâ oluna ve sülüs-i mezbûrdan her ne bâkī kalırsa vücûh-ı hayra harc u sarf oluna ve sülüsân-ı terekemi dahi Amasya kasabasında sâkine li-ebeveyn kız karındaşım Fâtıma Hatun’a îsâl oluna deyü vasiyyet ve tenfîzine işbu müdde‘î-i mezbûr İsmail Efendi’yi bizim huzûrumuzda vasiyy-i muhtâr nasb u ta‘yîn edip ol dahi ber-vech-i muharrer vesâyet-i mezbûreyi muvâcehesinde baʻde’l-kabûl mezbûr Hâfız İbrahim Odabaşı musırran alâ-îsâʼihî vefât eyledi, biz bu husûsa bu vech üzere şâhidleriz, şehâdet dahi ederiz deyü herbiri edâ-yı şehâdet-i şer‘iyye eylediklerinde ba‘de’t-taʻdîl ve’t-tezkiye şehâdetleri makbûl olmağın mûcebiyle baʻde’l-hükm vâki‘ hâli mevlânâ-yı mezbûr mahallinde ketb u tahrîr ba‘dehû ma‘an baʻs olunan ümenâ-i şer‘le meclis-i şer‘a gelip herbiri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâlis min-Recebi’l-ferd sene semân ve hamsîn ve mi’e ve elf. Şuhûdü’l-hâl: Ahmed Efendi b. Ali, Ali Efendi b. Süleyman, Osman Efendi b. Mustafa, Ahmed Efendi b. Mustafa.