Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 140 Hüküm no: 94 Orijinal metin no: [23b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ohan v. Mezik’in vârislerinden olan kardeşi Artin’in terekeden hissesini alması Husûs-ı âti’l-beyânın mahallinde ketb u tahrîri iltimâs olunmağın savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi medîne-i Hazret-i Ebî Eyyüb el-Ensârî mahallâtından Topkapısı hâricinde vâki‘ Takyeci Mahallesi’nde mütemekkin iken bundan akdem hâlik olan Ohan v. Mezik’in hayâtında mütemekkin olduğu menzile varıp zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî ettikde hâlik-i mesfûrun verâseti zevce-i menkûha-i metrûkesi Göle bt. Manas ile li-ebeveyn karındaşı Artin ve li-ebeveyn kız karındaşı Göle nâm Nasrânî’ye münhasıra olduğu şer‘an zâhir ve müteʻayyen oldukdan sonra mezbûr Artin meclis-i ma‘kūd-ı mezkûrda hâlik-i mesfûrun zevcesi ve terekesine bi’l-verâse vâzıʻatü’l-yed olan işbu râfiʻü’l-kitâb mersûme Göle muvâcehesinde ikrâr ve takrîr-i kelâm edip irsen bana isâbet eden mecmû‘u iki bin akçe kıymetli bir köhne poşu ve bir köhne mâî çuka nimten ve bir köhne alaca kaftan ve bir köhne zıbın, iki beyâz dizlik ve bir mâî çuka biniş ve bir köhne hilâlî ve iki sahan ve üç sagīr lenger ve bir kebîr lengerî ve bir köhne çakşırı mersûme Göle Nasrâniye hissem mukābelesinde bana def‘ ve teslîm edip ben dahi eşyâ-i muharrere-i mezkûr Ohan’ın nukūd ve sâir terekesine müte‘allika âmme-i mîrâs da‘vâsından zevcesi merkūme Göle Nasrâniye’nin zimmetini ibrâ-i âmm-ı kātıʻu’n-nizâ‘la ibrâ ve ıskāt edip vechen mine’l-vücûh ve sebeben mine’l-esbâb da‘vâ ve nizâ‘ım kalmadı dedikde gıbbe’t-tasdîki’ş-şer‘î vâki‘ hâli mevlânâ-yı mezbûr mahallinde ketb u tahrîr ba‘dehû ümenâ-i şer‘le meclis-i şer‘a gelip herbiri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâbiʻ aşer min-Recebi’l-mürecceb sene semân ve hamsîn ve mi’e ve elf. Şuhûdü’l-hâl: Ahmed Efendi b. Hasan İmâm, Baba Ali b. Mehmed, Saka Mehmed Beşe b. Abdullah, Ahmed Beşe b. Ömer, Kara Mehmed [b.] Hüseyin.