Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 141 Hüküm no: 95 Orijinal metin no: [23b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emetullah Hatun’un vârislerinin tereke konusundaki anlaşmazlıkları Husûs-ı âti’l-beyânın mahallinde istimâ‘ ve tahrîri için savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Zal Paşa Mahallesiʼnde vâki‘ Abdülcelil Bey b. el-merhûm Mehmed Efendi’nin menziline varıp zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî ettikde medîne-i mezbûrda hâlâ beytülmâl kabzına meʼmûr olan fahrü’l-akrân [24a] es-Seyyid Ahmed Ağa b. es-Seyyid Mehmed meclis-i ma‘kūd-ı mezkûrda medîne-i mezbûrede Selâhi Mehmed Mahallesiʼnde sâkine iken bundan akdem vefât eden Emetullah Hatun bt. Mehmed’in zevci ve terekesine bi’l-verâse vâzıʻu’l-yed olan diğer es-Seyyid Ahmed Ağa b. es-Seyyid Mehmed mahzarında bi’l-emâne üzerine da‘vâ ve takrîr-i kelâm edip müteveffâ-i mezbûrenin terekesinden mecmû‘u yüz on guruş kıymetli bir çift altın bilezik ve bir inci küpe ve bir köhne su samuru sagīr kürk ve iki tencere ma‘a-kapak ve bir sini ve beş lengerî ve bir kebîr abdest leğeni ve dört sahan ve bir kebîr lengerî ve bir leğen ma‘a ibrik ve bir şamʻdân ve iki basma makʻad ve bir köhne kırmızı çuka makʻadı mezbûr es-Seyyid Ahmed ketm ve ihfâ edip defter-i kassâma idhâlden imtinâ‘ eder, suâl olunup defter-i mezbûr[a] idhâle tenbîh olunmak matlûbumdur dedikde gıbbe’s-suâl mezbûr Ahmed Ağa cevâbında müteveffât-ı mezbûre Emetullah Hatun hâl-i hayâtında ve kemâl-i akl [u] sıhhatinde eşyâ-i muharrere-i mezkûreyi kendüsü beyʻ ve semenlerini dahi umûruna sarfla istihlâk edip eşyâ-i mezkûreyi ben kabz eylemedim deyü inkâr edicek, müdde‘î-i mezbûrdan müddeʻâsını mübeyyine beyyine taleb olundukda ityân-ı beyyineden izhâr-ı acz ile istihlâf etmeğin fi’l-vâki‘ eşyâ-i muharrere-i mezkûreyi müteveffât-ı mezbûrenin hayâtında ve baʻde’l-vefât ketm ve ihfâ etmeyip ve üzerine red ve zımândan nesne lâzım gelmediğine mezbûr Mehmed Ağa’ya yemîn teklîf olundukda ol dahi hasbe’l-mesûl yemîn biʼllâhi’l-aliyyi’l-aʻlâ etmeğin emîn-i mezbûr bilâ-beyyine bî-vech mu‘ârazadan men‘-birle vâki‘ hâli mevlânâ-yı mezbûr mahallinde ketb u tahrîr ba‘dehû ma‘an baʻs olunan ümenâ-i şer‘le meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’l-âşir min-Recebi’l-ferd li-sene semân ve hamsîn ve mi’e ve elf. Şuhûdü’l-hâl: Fahrü’l-kuzât Mehmed Necib Efendi b. el-merhûm Mustafa, Musa Bey b. Ebûbekir, Abdülcelil Bey b. Mehmed Efendi, Mehmed Çelebi b. el-Hâc İbrahim, İbrahim Çelebi [b.] el-Hâc Abdülhalim, Mustafa Çelebi b. Hüseyin, es-Seyyid Mehmed b. es-Seyyid Hüseyin, Ahmed Efendi b. Mustafa.