Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 145 Hüküm no: 101 Orijinal metin no: [25a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mumcu tâifesinden Panayot’un vârisi olmaksızın ölümüyle beytülmâla kalan ahırın Zeyneb Hatun’a satılması Husûs-ı âti’l-beyânın mahallinde ketb u tahrîri iltimâs olunmağın savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi Havâss-ı Refîʻa kazâsından Mevlevîhâne Yenikapısı hâricinde vâki‘ hâlâ Hâslar beytülmâlını kabza meʼmûr olan fahrü’l-akrân İbrahim Ağa b. Halil’in sâkin olduğu menzile varıp zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî ettikde sâlifü’z-zikr Yenikapı hâricinde Mahmud Ağa Mahallesi’nde mumcu tâifesinden iken bundan akdem hâlik olan Panayot v. Sava’nın? zâhirde vâris-i ma‘rûfu olmayıp terekesi cânib-i beytülmâla âid olmağla hâlik-i mezbûrun terekesini kabz eden mûmâ-ileyh İbrahim Ağa meclis-i ma‘kūd-ı mezkûrda işbu râfiʻatü’l-kitâb Zeyneb Hatun bt. İbrahim mahzarında bi’l-emâne ikrâr-ı tâm ve takrîr-i kelâm edip hâlik-i mezbûrun mahalle-i mezbûrede vâki‘ iki tarafdan bağçe ve iki tarafdan tarîk-i âm ile mahdûd bir bâb harâb ahır yeri bi’l-izni’ş-şer‘î sûk-ı sultânîde baʻde’l-müzâyede ragabât-ı nâs bi’l-külliye münkatıʻa oldukdan sonra mezbûre Zeyneb Hatun üzerinde kırk guruşda karâr edip ziyâde ile tâlib-i âhar zuhûr etmeyip ve meblağ-ı mezbûr ahır-ı mahdûd-ı mezkûrun el-yevm semen-i misli idiği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer oldukdan sonra tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile semen-i misli olan meblağ-ı mezbûr kırk guruşa mezbûre Zeyneb Hatun’a bi’l-emâne beyʻ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl ve kabz eylediğinden sonra semen-i misli olan meblağ-ı mezbûr kırk guruşu mezbûre Zeyneb Hatun yedinden bi’l-emâne ahz u kabz eyledim, baʻde’l-yevm ahır-ı mahdûd-ı mezkûre merkūme Zeyneb Hatun’un mülk-i müşterâsı ve hakk-ı sırfı olmuşdur, keyfe mâ teşâ ve tahtâr mutasarrıfe olsun dedikde gıbbe’t-tasdîki’ş-şer‘î vâki‘ hâli mevlânâ-yı mezbûr mahallinde ketb u tahrîr, ba‘dehû ma‘an baʻs olunan ümenâ-i şer‘le meclis-i şer‘a gelip herbiri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâmin min-Recebi’l-ferd li-sene semân ve hamsîn ve mi’e ve elf. Şuhûdü’l-hâl: Fahrü’l-kirâm Mevlevîhâne Şeyhi Mehmed Efendi, diğer Mehmed Efendi b. Ahmed, İbrahim Ağa b. Ahmed, Aşcı Ali Dede b. ( ), Halil Efendi b. ( ), Hasan Beşe b. Mehmed, es-Seyyid Mehmed b. es-Seyyid Mustafa, es-Seyyid Ömer b. ( ), Ömer Efendi b. Osman ve gayruhum.