Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 146 Hüküm no: 102 Orijinal metin no: [25b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ohan v. Mezik’in vârislerinden olan hanımı ile kız kardeşi arasındaki anlaşmazlık Husûs-ı âti’l-beyânın mahallinde istimâʻ ve tahrîri için savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî- mahallâtından Topkapısı hâricinde vâki‘ Takyeci Mahallesi’nde mütemekkin iken bundan akdem hâlik olan Ohan v. Mezik’in hayâtında mütemekkin olduğu menzile varıp zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî ettikde hâlik-i mezbûrun verâseti zevce-i metrûkesi Göle bt. Manas ile li-ebeveyn er karındaşı Artin ve li-ebeveyn kız karındaşı diğer Göle’ye münhasıra olduğu şer‘an zâhir ve müteʻayyen oldukdan sonra şahsı ta‘rîf-i şer‘î ile mu‘arrefe olan kız karındaşı diğer Göle nâm Nasrâniye meclis-i ma‘kūd-ı mezkûrda hâlik-i mezbûrun zevcesi ve terekesine bi’l-verâse vâzıʻatü’l-yed olan işbu râfiʻatü’s-sifr mezbûre Göle nâm Nasrâniye muvâcehesinde üzerine da‘vâ ve takrîr-i kelâm edip karındaşım hâlik-i mezbûrun terekesinden olup işbu mu‘âyene ve müşâhede olunan altın halhaldan hissemi mezbûre Göle Nasrâniye’den hissemi taleb eylediğimde teslîmden imtinâ‘ eder, suâl olunsun dedikde gıbbe’s-suâl mezbûre Göle Nasrâniye cevâbında zikr olunan halhalı zevcim hâlik-i mezbûr hâl-i hayâtında ve kemâl-i akl [u] sıhhatinde helâkinden sekiz ay mukaddem huzûr-ı Müslimîn’de bana hibe ve temlîk ve teslîm edip ben dahi ber-vech-i muharrer meclis-i hibede ittihâb ve kabûl ve kabz edip ol vechile benim mülk-i mevhûbem olmuşdur deyü def‘le mukābele edicek, gıbbe’l-istintak ve’l-inkâr mezbûre Göle Nasrâniye’den def‘-i meşrûhuna mutâbık mübeyyine beyyine taleb olundukda udûl-ı ahrâr-ı ricâl-i Müslimîn’den mahalle-i mezbûre imâmı Ahmed Efendi b. Hasan ve Baba Ali b. Mehmed nâm kimesneler li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka hâlik-i mezbûr Ohan v. Mezik v. Artin hâl-i hayâtında ve kemâl-i akl [u] sıhhatinde helâkinden sekiz ay mukaddem işbu mu‘âyene ve müşâhede olunan altın halhalını işbu zevcesi mezbûre Göle nâm Nasrâniye’ye bizim huzûrumuzda hibe ve temlîk ve teslîm edip ol dahi ber-vech-i muharrer meclis-i hibede ittihâb ve kabûl ve kabz edip ol vechile halhal-ı mezbûr mersûme Göle Nasrâniye’nin mülk-i mevhûbesi olmuşdur, biz bu husûsa bu vech üzere şâhidleriz, şehâdet dahi ederiz deyü herbiri edâ-yı şehâdet-i şer‘iyye eylediklerinde ba‘de’t-taʻdîl ve’t-tezkiye şehâdetleri makbûle olmağın mûcebiyle baʻde’l-hükm vâki‘ hâli mevlânâ-yı mezbûr mahallinde ketb u tahrîr, ba‘dehû ma‘an baʻs olunan ümenâ-i şer‘le meclis-i şer‘a gelip herbiri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâbiʻ aşer min-Recebi’l-ferd li-sene semân ve hamsîn ve mi’e ve elf. Şuhûdü’l-hâl: Ahmed Efendi b. Hasan, Saka Mehmed b. Abdullah, Ahmed Beşe b. Ömer, Kara Mehmed Beşe b. Hasan, Osman Beşe b. Salih.