Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 149 Hüküm no: 105 Orijinal metin no: [26a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Anaştaş v. Pavlo’nun mülk evini Şaban Ağa Nukud Vakfı’na istiğlal yoluyla satması Husûs-ı âti’l-beyânın mahallinde ketb u tahrîri için savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi Havâss-ı Refîʻa kazâsına tâbi‘ Makrihora karyesinde mütemekkin Anaştaş v. Pavlo nâm zimmînin mütemekkin olduğu menzile varıp zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî ettikde mesfûr Anaştaş zimmî meclis-i ma‘kūd-ı mezkûrda karye-i mezbûrede vâki‘ Şaʻban Ağa nukūd-ı mevkūfesine bi’l-fi‘il mütevellîsi olan işbu râfiʻü’l-kitâb Süleyman Efendi b. İsmail mahzarında ikrâr-ı tâm ve takrîr-i kelâm edip yedimde mülküm olup karye-i mezbûrede vâki‘ bir tarafdan hadîka Ahmed Ağa mülkü ve iki tarafdan benim âhar mülküm ve bir tarafdan tarîk-i âm ile mahdûd bir sundurma ve havlu ve taş duvar ve bir sagīr sundurmayı muhtevî mülküm menzilimi bi-tarîkı’l-istiğlâl merkūm Süleyman Efendi’ye yüz elli guruşa beyʻ ve teslîm ol dahi mâl-ı vakf-ı mezbûr ile iştirâ ve tesellüm ve kabûl edip meblağ-ı mezbûr yüz elli guruşu mütevellî-i merkūm yedinden bi’t-tamam ahz u kabz eylediğinden sonra menzil-i mahdûd-ı mezkûru ba‘de’t-tahliyyeti’ş-şer‘iyye ve’t-tekābuzi’l-mer‘î târîh-i kitâbdan üç sene tamamına değin altmış yedi buçuk guruşa mütevellî-i merkūm Süleyman Efendi bana îcâr ve teslîm eylediğinde ben dahi ber-vech-i muharrer istîcâr ve kabûl eyledim dedikde gıbbe’t-tasdîki’ş-şer‘î vâki‘ hâli mevlânâ-yı mezbûr mahallinde ketb u tahrîr ba‘dehû ma‘an baʻs olunan ümenâ-i şer‘le meclis-i şer‘a gelip herbiri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâbiʻ aşer min-Cumâdeluhrâ li-sene semân ve hamsîn ve mi’e ve elf. Şuhûdü’l-hâl: Mollâ Ahmed b. İbrahim, Resul Bey b. İbrahim Bey, Musa Beşe b. Mustafa, Murad Beşe b. Yusuf, el-Hâc Murad b. Ali, Veli Beşe b. Osman, Mollâ İbrahim b. İsmail, Cafer Odabaşı b. Yusuf, Salih Beşe b. Yusuf, Mehmed Beşe b. Abdullah.