Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 150 Hüküm no: 106 Orijinal metin no: [26a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Makrihora köyünden Ahmed Beşe’nin vârislerine taksim edilen terekesi Dergâh-ı âlî -dâme mahfûfen bi’l-maʻâlî- yeniçerilerinin otuz bir bölüğün odası neferâtından olup Havâss-ı Refîʻa kazâsına tâbi‘ Makrihora karyesinde sâkin iken bundan akdem vefât eden Ahmed Beşe b. Hasan’ın zâhirde vâris-i ma‘rûfu olmamak zuʻmuyla mahmiye-i İstanbul’da hâlâ yeniçeri beytülmâlını kabza meʼmûr olan fahrü’l-akrân Hüseyin Ağa b. Abdullah tarafından vekîl-i sâbitü’l-vekâlesi beytülmâl nâzırı Hüseyin Ağa b. Ahmed müteveffâ-i mezbûrun terekesini bi’l-vekâle kabz ettikden sonra müteveffâ-i mezbûrun vilâyet-i Anadolu’da [26b] Şebinkarahisar kazâsına tâbi‘ Ragaza? karyesinde sâkin li-ebeveyn kız karındaşı Sâliha Hatun ile li-ebeveyn er karındaşı oğlu Hasan’ın hisse-i irsiyyelerini ahz u kabz, zabt u hıfz ve kendülere îsâle vasiyy-i muhtârları olduğu vekîl-i mezbûr Hüseyin Ağa muvâcehesinde vech-i şer‘î üzere isbât eden es-Seyyid Mehmed b. es-Seyyid Süleyman taleb ve ma‘rifetiyle tahrîr ve taksîm olunan tereke-i müteveffâ-i mezbûrdur ki ber-vech-i âtî zikr olunur. Fi’l-yevmi’s-sânî ve’l-ışrîn min-Recebi’l-ferd sene semân ve hamsîn ve mi’e ve elf. Köhne zıbın 90 akçe Köhne destâr 24 akçe Yatağan bıçak 540 akçe Kara bıçak 15 akçe Der-zimmet-i Solak Mehmed 960 akçe Der-zimmet-i Kostantin zimmî 8.160 akçe Der-zimmet-i Davudpaşa’da sâkin Ali 120 akçe Cem‘an yekûn: 9.809 akçe. Minhâ el-ihrâcât: Techîz ve tekfîn 720 akçe Resm-i emîn-i beytülmâl 980 akçe Resm-i âdî 245 akçe Kalemiye-i kâtib 90 akçe Çukadâriye 60 akçe İhzâriye ve kaydiye 45 akçe Sâir mesârif 120 akçe Yekûnü’l-mesârif: 2.260 [akçe]. Sahhe’l-bâkī li’t-taksîm beyne’l-verese: 7.549 akçe. Hissetü’l-mezbûre Sâliha 3.774 akçe Hissetü’l-mezbûr Hasan 3.774 akçe