Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 151 Hüküm no: 107 Orijinal metin no: [26b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dergâh-ı Âlî yeniçerilerinden Ahmed Beşe’nin hayatta iken Seyyid Mehmed’i vasi tayin etmiş olduğu Husûs-ı âti’l-beyânın mahallinde istimâ‘ ve tahrîri için savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi Havâss-ı Refîʻa kazâsına tâbi‘ Makrihora karyesinde sâkin Dergâh-ı âlî -dâme mahfûfen bi’l-maʻâlî- yeniçerilerinin otuz bir bölük odası neferâtından olup bundan akdem vefât eden Ahmed Beşe b. Hasan’ın hayâtında sâkin olduğu menzile varıp zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî ettikde müteveffâ-i mezbûrun ber-vech-i âtî vasiyy-i muhtârı olduğunu iddiʻâ eden işbu râfiʻü’l-kitâb es-Seyyid Mehmed b. es-Seyyid Süleyman meclis-i ma‘kūd-ı mezkûrda müteveffâ-i mezbûrun zâhirde vâris-i ma‘rûfu olmamak zuʻmuyla terekesine vaz‘-ı yed eden mahmiye-i İstanbul’da hâlâ yeniçeri beytülmâlı emîni olan fahrü’l-akrân Hüseyin Ağa b. Abdullah tarafından vekîl-i sâbitü’l-vekâlesi Hüseyin Ağa b. Ahmed mahzarında üzerine da‘vâ ve takrîr-i kelâm edip müteveffâ-i mezbûr Ahmed Beşe b. Hasan b. Abdullah fevtinden bir ay mukaddem ben bi-emri’llâhi te‘âlâ vefât eylediğimde cemî‘ terekem ve zimem-i nâsda olan hukūkum ahz u kabz olunup sünnet-i seniyye üzere techîz ve tekfînim görülüp düyûn-ı müsbetem edâ olundukdan sonra bâkī kalan terekemi vilâyet-i Anadolu’da Şebinkarahisar kazâsına tâbi‘ Ragaza? karyesinde sâkin li-ebeveyn karındaşım Sâliha Hatun ile li-ebeveyn er karındaşım oğlu Hasan’a îsâle oluna deyü vasiyyet ve tenfîzine huzûr-ı Müslimîn’de beni vasiyy-i muhtâr nasb u ta‘yîn eylediğinde ben dahi ber-vech-i muharrer vesâyet-i mezbûreyi muvâcehesinde baʻde’l-kabûl mezbûr Ahmed Beşe fevt olmağla tenfîz-i vesâyâ murâd eylediğimde vekîl-i mezbûr Hüseyin Ağa tereke-i müteveffâ-i mezbûra bi-gayr-ı hakkın vaz‘-ı yed eder, suâl olunsun dedikde gıbbe’s-suâl vekîl-i mezbûr cevâbında tereke-i müteveffâ-i mezbûra bi’l-emâne vaz‘-ı yed eylediğini ikrâr lâkin müdde‘î-i mezbûrun ber-vech-i muharrer vasiyy-i muhtâr olduğunu inkâr edicek, müdde‘î-i mezbûrdan [27a] müddeʻâsını mübeyyine beyyine taleb olundukda udûl-ı ahrâr-ı ricâl-i Müslimîn’den karye-i mezbûr sâkinlerinden es-Seyyid Mustafa Beşe b. Hasan ve es-Seyyid Hasan b. Hüseyin nâm kimesneler li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka müteveffâ-i mezbûr Ahmed Beşe b. Hasan b. Abdullah fevtinden bir ay mukaddem ben bi-emri’llâhi te‘âlâ vefât eylediğimde cemî‘ terekem ve zimem-i nâsda olan hukūkum ahz u kabz olunup sünnet-i seniyye üzere techîz ve tekfînim görülüp düyûn-ı müsbetem edâ olundukdan sonra bâkī terekemi vilâyet-i Anadolu’da Şebinkarahisar kazâsına tâbi‘ Ragaza? karyesinde sâkin li-ebeveyn kız karındaşım Sâliha Hatun ile li-ebeveyn er karındaşım oğlu Hasan’a îsâl oluna deyü vasiyyet ve tenfîzine bizim huzûrumuzda işbu müdde‘î-i mezbûr es-Seyyid Mehmed’i vasiyy-i muhtâr nasb u ta‘yîn eylediğinde ol dahi ber-vech-i muharrer vesâyet-i mezbûreyi muvâcehesinde baʻde’l-kabûl mezbûr Ahmed Beşe musırran alâ-îsâʼihî vefât eyledi, biz bu husûsa bu vech üzere şâhidleriz, şehâdet dahi ederiz deyü herbiri edâ-yı şehâdet-i şer‘iyye eylediklerinde ba‘de’t-taʻdîl ve’t-tezkiye şehâdetleri makbûle olmağın mûcebiyle baʻde’l-hükm vâki‘ hâli mevlânâ-yı mezbûr mahallinde ketb u tahrîr ba‘dehû ma‘an baʻs olunan ümenâ-i şer‘le meclis-i şer‘a gelip herbiri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâmin ve’l-ışrîn min-Recebi’l-ferd sene semân ve hamsîn ve mi’e ve elf. Şuhûdü’l-hâl: Süleyman Efendi b. İsmail, Süleyman Beşe b. Veli, Ahmed Efendi b. Mustafa, Süleyman Beşe b. İbrahim, Ali Beşe b. Ömer.