Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 152 Hüküm no: 108 Orijinal metin no: [27a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ermeni Avanis’in ölen damadı Melkon’daki alacağını terekesinden almak istemesi Husûs-ı âti’l-beyânın mahallinde istimâ‘ ve tahrîri için savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de İskele başında değirmenci iken bundan akdem hâlik olan Melkon v. Melkon’un hayâtında mütemekkin olduğu menzile varıp zeyl-i kitâbda muharrerü’l-esâmî Müslimîn huzûrunda akd-i mecli-i şer‘-i Nebevî ettikde hâlik-i mesfûrun kayınatası işbu râfiʻü’s-sifr Avanis v. Setrak nâm Ermeni meclis-i ma‘kūd-ı mezkûrda hâlik-i mesfûrun zevcesi ve evlâd-ı sıgārının vasîleri olup tereke-i hâlik-i mesfûra bi’l-verâse ve bi’l-vesâye vâzıʻatü’l-yed olan Sima bt. Avanis tarafından vekîl-i sâbitü’l-vekâlesi olan Mircan v. Andon muvâcehesinde üzerine da‘vâ ve takrîr-i kelâm edip dâmâdım hâlik-i mersûm Melkon v. Melkon v. Artin zimmetinde cihet-i karz-ı şer‘îden yüz yirmi guruş hakkım olup hatta hâlik-i mersûm helâkinden mukaddem hâl-i hayâtında ve kemâl-i akl [u] sıhhatinde meblağ-ı mezbûr cihet-i merkūmeden zimmetinde bana vâcibü’l-edâ deyni olduğunu Nasârâ muvâcehesinde kirâren ve mirâren ikrâr ve işhâd edip kable’l-edâ hâlik olmağla meblağ-ı mezbûru terekesinden taleb ederim, suâl olunsun dedikde gıbbe’s-suâl ve’l-inkâr müdde‘î-i mesfûrdan müddeʻâsını mübeyyine beyyine taleb olundukda udûl-ı Nasârâ’dan olup Câmi‘-i Kebîr Mahallesi’nde değirmende mütemekkin Papa Artin v. David ve Dülger Artin v. Agop nâm Ermeniler li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka hâlik-i mersûm Melkon v. Melkon v. Artin zimmetinde cihet-i karz-ı şer‘îden kayınatası işbu müdde‘î-i mesfûr Avanis nâm Ermeninin yüz yirmi guruş hakkı olup hatta hâlik-i mesfûr helâkinden mukaddem hâl-i hayâtında ve kemâl-i akl [u] sıhhatinde meblağ-ı mezbûr cihet-i merkūmeden zimmetinde müdde‘î-i mesfûr[a] vâcibü’l-edâ deyn olduğunu bizim huzûrumuzda kirâren ve mirâren ikrâr ve bizi işhâd eyledi, biz bu husûsa bu vech üzere şâhidleriz, şehâdet dahi ederiz deyü herbiri edâ-yı şehâdet-i şer‘iyye eylediklerinde ba‘de riʻâyeti şerâiti’l-kabûl şehâdetleri makbûle olmağın gıbbe’t-tahlîfü’ş-şer‘î mûcebiyle baʻde’l-hükm vâki‘ hâli mevlânâ-yı mezbûr mahallinde ketb u tahrîr ba‘dehû ma‘an baʻs olunan ümenâ-i şer‘le meclis-i şer‘a gelip herbiri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâmin ve’l-ışrîn min-Recebi’l-ferd li-sene semân ve hamsîn ve mi’e ve elf. Şuhûdü’l-hâl: Es-Seyyid Mehmed b. es-Seyyid Mustafa, es-Seyyid Ahmed b. es-Seyyid Mehmed, Ömer Çelebi b. ( ), Ahmed Efendi b. Mustafa Efendi, Hüseyin Çelebi b. Mehmed, Musa Bey b. Ömer.