Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 153 Hüküm no: 109 Orijinal metin no: [27b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Karaca köyünden Ali Beşe’nin kardeşi Mehmed Beşe ile ortak olduğu evdeki hissesini kardeşine satması Husûs-ı âti’l-beyânın mahallinde ketb u tahrîri için savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi Havâss-ı Refîʻa kazâsı muzâfâtından Terkos nâhiyesine tâbi‘ Hisarbeyli karyesinde sâkin Ahmed Beşe’nin menziline varıp zeyl-i kitâbda muharrerü’l-esâmî Müslimîn huzûrunda akd-i meclis-i Nebevî ettikde nâhiye-i mezbûra tâbi‘ Karaca karyesinde sâkin Ali Beşe b. Hüseyin tarafından husûs-ı âti’l-beyânda vekîl olduğu Hasan Beşe b. Ali ve Hüseyin Beşe b. Abdullah şehâdetleriyle şer‘an sâbit ve sübût-ı vekâletine hükm-i şer‘î lâhık olan Mustafa Beşe b. Ahmed meclis-i ma‘kūd-ı mezkûrda müvekkil-i mezbûrun karındaşı işbu râfiʻü’l-kitâb Mehmed Beşe b. Hüseyin mahzarında bi’l-vekâle ikrâr ve takrîr-i kelâm edip sâlifü’z-zikr Karaca karyesinde vâki‘ zikri âtî çiftlik tâʻbir olunur menzilin nısfı mezbûr Mehmed Beşe’nin ve nısfı âharı müvekkilim mezbûr Ali Beşe’nin mülkü olup mârru’z-zikr Karaca karyesinde vâki‘ bir tarafdan bostan ve bir tarafdan otlak havlusu ve bir tarafdan harman yeri ve bir tarafdan tarîk-i âm ile mahdûd üç bâb fevkānî oda ve iki sofa ve tahtında bir oda ve bir fırın ve ahır ve bir su kuyusu ve kenîf ve çatma? anbar ve hâriciyyesinde bir bâb fevkānî oda ve bir sofa ve ahır ve pekmezlik ve bir camus ahırı ve etrâf-ı erba‘ası sundurma ve bir samanhâne ve kenîf ve bir koru? ahırı muhtevî çiftlik tâʻbir olunur menzilden müvekkilim mezbûr Ali Beşe nısfı hissesini bi-cümleti’t-tevâbiʻ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile müvekkilim mezbûr Ali Beşe karındaşı merkūm Mehmed Beşe’ye beş yüz guruş[a] beyʻ ve temlîk ve teslîm eylediğinde ol dahi ber-vech-i muharrer iştirâ ve temellük ve tesellüm ve kabûl ve kabz edip semeni olan meblağ-ı mezbûr beş yüz guruşu müvekkilim mezbûr Ali Beşe karındaşı merkūm Mehmed Beşe yedinden bi’t-tamam ve’l-kemâl ahz u kabz edip baʻde’l-yevm çiftlik tâʻbir olunur menzilin nısfı merkūm Mehmed Beşe’nin mülk-i müşterâsı ve hakk-ı sırfı olmuşdur, keyfe mâ yeşâ ve yahtâr mutasarrıf olsun dedi dedikde gıbbe’t-tasdîki’ş-şer‘î vâki‘ hâli mevlânâ-yı mezbûr mahallinde ketb u tahrîr ba‘dehû ma‘an baʻs olunan ümenâ-i şer‘le meclis-i şer‘a gelip herbiri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sânî aşer min-Cemâziyelâhir sene semân ve hamsîn ve mi’e ve elf. Şuhûdü’l-hâl: Ebûbekir Beşe b. Yusuf, Mehmed Beşe b. İbrahim, Ahmed Çelebi b. Mehmed, Uzun Mehmed Beşe b. Abdullah, Ahmed Beşe b. Ahmed, Hüseyin Beşe.