Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 155 Hüküm no: 111 Orijinal metin no: [28a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden Süleyman Ağa’nın kızı Zeyneb Hatun’un, daha önce vefât etmiş olan annesi Ayşe Hatun’un babasındaki mehir alacağındaki hissesini terekeye elkoyan kardeşi İsmail Ağa’dan istemesi Havâss-ı Refîʻa kādısı merhûm Ahmed Efendi’nin vakitleri tamam olup Damadzâde efendi hazretlerine ber-vech-i arpalık tevcîh ve yine bu dâ‘îlerine sipâriş olunduğu bu mahalle şerh verildi. (Mühür) Havâss-ı Refîʻa kazâsı muzâfâtından nefs-i Çatalca nâhiyesi sâkinlerinden olup bundan akdem vefât eden Süleyman Ağa b. İsmail’in sulbiye kebîre kızı ve zâtı ta‘rîf-i şer‘î ile mu‘arrefe olan Zeyneb Hatun tarafından husûs-ı âti’l-beyânda vekîl-i müsecceli olan işbu râfiʻü’l-kitâb Mehmed Ağa b. Ali meclis-i şer‘-i şerîf-i enverde müteveffâ-i mezbûrun sulbî kebîr oğlu olup terekesine bi’l-verâse vaz‘-ı yed eden İsmail Ağa nâm kimesne mahzarında bi’l-vekâle üzerine da‘vâ ve takrîr-i kelâm edip müvekkilem mezbûre Zeyneb Hatun’un vâlidesi olup merkūm Süleyman Ağa’dan mukaddem fevt olan Âişe’nin müteveffâ-i sânî-i mezbûr Süleyman Ağa b. İsmail b. Abdullah zimmetinde mütekarrer ve ma‘kūdün-aleyh on dokuz bin iki yüz akçe mehr-i müeccel hakkı olup hatta müteveffâ-i sânî-i mezbûr Süleyman Ağa hâl-i hayâtında ve kemâl-i akl [u] sıhhatinde fevtinden dört ay mukaddem zevcesi müteveffât-ı evvel-i mezbûre Âişe Hatun’a ol kadar akçe zimmetinde mehr-i müeccel deyni olduğunu huzûr-ı Müslimîn’de ikrâr ve işhâd edip veresesine kable’l-edâ fevt olmağla mehr-i mezkûreden müvekkilem mezbûre Zeyneb Hatun’a isâbet eden altı bin dört yüz akçe hissesini müteveffâ-i sânî-i mezbûr Süleyman Ağa’nın terekesinden bi’l-vekâle taleb ederim, suâl olunsun dedikde gıbbe’s-suâl ve’l-inkâr vekîl-i mezbûrdan müddeʻâsını mübeyyine beyyine taleb olundukda udûl-ı ahrâr-ı ricâl-i Müslimîn’den mahmiye-i İstanbul’da Sarıgez Mahallesi sâkinlerinden es-Seyyid Mustafa Çelebi b. Hüseyin ve el-Hâc İsmail Çelebi b. Hasan nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-hakīka işbu müeccele-i mezbûre Zeyneb Hatun’un vâlidesi olup merkūm Süleyman Ağa’dan mukaddem fevt olan Âişe’nin müteveffâ-i sânî-i mezbûr Süleyman Ağa b. İsmail b. Abdullah zimmetinde mütekarrer ve ma‘kūdün-aleyh on dokuz bin iki yüz akçe mehr-i müeccel hakkı olup müteveffâ-i sânî-i mezbûr Süleyman Ağa hâl-i hayâtında ve kemâl-i akl [u] sıhhatinde fevtinden dört ay mukaddem zevcesi müteveffât-ı evvel-i mezbûre Âişe Hatun’a ol kadar akçe zimmetinde mehr-i müeccel deyni olduğunu bizim huzûrumuzda ikrâr ve bizi işhâd eyledi, biz bu husûsa bu vech üzere şâhidleriz, şehâdet dahi ederiz deyü herbiri edâ-yı şehâdet-i şer‘iyye eylediklerinde ba‘de’t-taʻdîl ve’t-tezkiye şehâdetleri makbûle olmağın mûcebiyle baʻde’l-hükm ve’t-tenbîh mâ-hüve’l-vâki‘ bi’t-taleb ketb olundu. Fi’l-yevmi’s-sâbiʻ aşer min-Şaʻbâni’l-muʻazzam sene semân ve hamsîn ve mi’e ve elf. Şuhûdü’l-hâl: Es-Seyyid Mustafa b. Hüseyin, el-Hâc İsmail b. Hasan, es-Seyyid Mehmed b. Mustafa, es-Seyyid Ahmed b. Mehmed, Ahmed b. Mehmed, Ahmed Efendi b. Mustafa, Mehmed Said Efendi b. Mustafa, Hüseyin Çelebi b. Mehmed, Musa Bey b. ( ), Mehmed Çelebi b. Abdullah.