Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 163 Hüküm no: 118 Orijinal metin no: [30a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kapıkethüdası Mehmed Ağa’nın vefât eden el-Hâc Mehmed’in hanımı Ayşe Hatun ve kızı Hatice ile birlikte vârisi olduğunu ispatlaması Medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Takyecibaşı Mahallesiʼnde sâkin iken bundan akdem vefât eden el-Hâc Mehmed b. Mehmed’in ber-vech-i âtî usûbet-i nesebiyye cihetinden vârisi ve li-ebeveyn er karındaşı oğlu olduğunu iddiʻâ eden Kapıkethüdâsı işbu râfiʻü’l-kitâb Mehmed Ağa b. Mustafa meclis-i şer‘-i şerîf-i enverde müteveffâ-i mezbûrun zevce-i menkûha-i metrûkesi ve sulbiye sagīre kızı Hadice’nin vâlidesi ve tesviye-i umûruna vasiyyesi olmağla tereke-i müteveffâ-i mezbûra bi’l-verâse ve’l-vesâye vâzıʻatü’l-yed olup zâtı ta‘rîf-i şer‘î ile mu‘arrefe olan Âişe Hatun bt. Abdullah mahzarında üzerine da‘vâ ve takrîr-i kelâm edip müteveffâ-i mezbûr el-Hâc Mehmed ile benim babam Mustafa li-ebeveyn karındaşlar olup babaları ismi Mehmed, dedeleri ismi Abdullah ve vâlideleri ismi Havvâ ve maskat-ı re’sleri vilâyet-i Anadolu’da Ayaş kazâsına tâbi‘ Üregin? karyesi olup müteveffâ-i mezbûrun verâseti zevcesi mezbûre Âişe Hatun ile sulbiye sagīre kızı Hadice’ye ve bana münhasıra ve terekesine bizden gayrı müstahikk-ı âhar olmayıp müteveffâ-i mezbûrun terekesi sekiz sehmden i‘tibâr olunup sihâm-ı mezbûreden bir sehmi zevcesi mezbûreye ve dört sehmi kızı sagīre-i mezbûreye ve bâkī üç sehmi bana isâbet etmekle müteveffâ-i mezbûrun terekesinden tashîh-i merkūm üzere hisse-i irsiyyemi mezbûre Âişe Hatun’dan taleb ederim, suâl olunup alıverilmesi matlûbumdur dedikde gıbbe’s-suâl mezbûre Âişe Hatun cevâbında tereke-i müteveffâ-i mezbûr bi’l-verâse ve’l-vesâye vâzıʻatü’l-yed olduğunu ikrâr lâkin müdde‘î-i mezbûrun ber-vech-i muharrer li-ebeveyn er karındaşı oğlu olduğunu inkâr edicek, müdde‘î-i mezbûrdan müddeʻâsını mübeyyine beyyine taleb olundukda udûl-ı ahrâr-ı ricâl-i Müslimîn’den mahmiye-i İstanbul’da Balat kurbünde Kesmekaya Mahallesiʼnde sâkin Osman Çelebi b. el-Hâc Süleyman ve sâlifü’z-zikr Üregin karyesi sâkinlerinden olup mahmiye-i mezbûrede Kariye Mahallesi’nde müsâfiren sâkin Hâfız İsmail Efendi b. Abdullah nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müteveffâ-i mezbûr el-Hâc Mehmed ile işbu müdde‘î-i mezbûrun babası Mustafa li-ebeveyn karındaşlar olup babaları ismi Mehmed, dedeleri ismi Abdullah ve anaları ismi Havvâ ve maskat-ı re’sleri vilâyet-i Anadolu’da Ayaş kazâsında tâbi‘ Üregin karyesi olup müteveffâ-i mezbûrun verâseti zevcesi mezbûre Âişe Hatun ile sulbiye sagīre kızı Hadice’ye ve li-ebeveyn er karındaşı oğlu müdde‘î-i mezbûr Mehmed Ağa’ya münhasıra ve terekesinin bunlardan gayrı müstahikk-ı âhar olduğu ma‘lûmumuz değildir, biz bu husûsa bu vech üzere şâhidleriz, şehâdet dahi ederiz deyü herbiri edâ-yı şehâdet-i şer‘iyye eylediklerinde ba‘de’t-taʻdîl ve’t-tezkiye şehâdetleri makbûle olmağın mûcebiyle müdde‘î-i mezbûrun verâsetine baʻde’l-hükm mâ-vaka‘a bi’t-taleb ketb olundu. Fi’l-yevmi’r-râbiʻ aşer min-Şaʻbâni’l-muʻazzam sene semân ve hamsîn ve mi’e ve elf. Şuhûdü’l-hâl: Ahmed Efendi [b.] Mustafa, Mehmed Said Efendi b. Mustafa, es-Seyyid Mehmed b. es-Seyyid Mustafa, es-Seyyid Ahmed b. es-Seyyid Mehmed, Hüseyin Çelebi [b.] Mehmed, Ahmed Ağa b. Mehmed.