Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 164 Hüküm no: 119 Orijinal metin no: [30a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hayran v. Kirkor’un vârislerinin terekeden hisselerini alarak birbirlerinin zimmetlerini ibra etmeleri Husûs-ı âti’l-beyânın mahallinde ketb [u] tahrîri için savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de İslâmbey Mahallesi’nde mütemekkin iken bundan akdem hâlik olan Hayran v. Kirkor’un hayâtında mütemekkin olduğu menzile varıp zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî ettikde hâlik-i mezbûrun verâseti sulbiye kebîre kızı Zehsade nâm Ermeniye ile li-ebeveyn er karındaşı oğulları Vartan v. David ve Yosef v. Artin nâm Ermenilere münhasıra ve tashîh-i meseleleri dört sehmden i‘tibâr olunup sihâm-ı mezbûreden iki sehmi mezbûre Zehsade nâm Ermeniyeye ve bir sehmi mezbûrân Vartan ve Yosef’den herbirine isâbeti tahakkukundan sonra mezbûrân Vartan ve Yosef nâm Ermeniler meclis-i ma‘kūd-ı mezkûrda işbu râfiʻatü’s-sifr kızı mezbûre Zehsade nâm Ermeniye muvâcehesinde herbiri bi’l-verâse ikrâr-ı tâm ve takrîr-i kelâm edip hâlik-i mezbûrun akār ve menkūl ve nukūd ve bi’l-cümle ism-i mâl ıtlâk olunur terekesine kızı Zehsade nâm Ermeniye vâzıʻatü’l-yed olmağla tereke-i hâlik-i mezbûrdan herbirimize isâbet eden yüz ellişer guruşu mezbûre Zehsade nâm Ermeniye bize def‘ ve teslîm, biz dahi ber-vech-i muharrer meblağ-ı mezbûru bi’t-tamam ve’l-kemâl ahz u kabz eyledik, baʻde’l-yevm tereke-i hâlik-i mezbûra müte‘allika âmme-i mîrâs da‘vâsından herbirimiz âharın zimmetini ibrâ-i âmm-ı kātıʻu’n-nizâ‘ ile ibrâ ve ıskāt edip vechen mine’l-vücûh ve sebeben mine’l-esbâb katʻâ birbirimiz ile husûs-ı mîrâsa müte‘allik da‘vâ ve nizâ‘ımız yokdur dediklerinde gıbbe’t-tasdîki’ş-şer‘î vâki‘ hâli mevlânâ-yı mezbûr mahallinde ketb u tahrîr, ba‘de ma‘a baʻs olunan ümenâ-i şer‘le meclis-i şer‘a gelip herbiri alâ-vukū‘ihî [30b] inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’l-âşir min-Şaʻbâni’l-muʻazzam sene semân ve hamsîn ve mi’e ve elf. Şuhûdü’l-hâl: Ahmed Efendi b. Mustafa, es-Seyyid Mehmed b. es-Seyyid Mustafa, es-Seyyid Ahmed b. es-Seyyid Mehmed, es-Seyyid Ömer, Hüseyin Çelebi b. Mehmed. Agop v. Kirkor, Papa Serkiz v. Papa Raʻnacı, Eder v. Gatem, Doros v. Modas.