Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 165 Hüküm no: 120 Orijinal metin no: [30b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden Ümmügülsüm Hatun’un küçük kızı Emetullah’ın dayısı İbrahim Beşe’ye verilmesi Medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Nazperver Mahallesiʼnde sâkine iken bundan akdem vefât eden Ümmügülsüm Hatun bt. Ahmed’in sadriye sagīre kızı Emetullah bt. Yusuf’un hâli İbrahim Beşe b. Ahmed meclis-i şer‘-i şerîf-i enverde sagīre-i mezbûrenin bâ-hüccet-i şer‘iyye vasiyy-i muhtârı olan işbu râfiʻatü’l-kitâb Afife Hatun bt. Abdullah mahzarında ikrâr-ı tâm ve takrîr-i kelâm edip sagīre-i mezbûre Emetullah’ın vasiyyesi olan mezbûre Afife Hatun’a beher yevm kadr-i ma‘rûf olan ikişer para nafaka ile infâk ve iksâ üzere kıbel-i şer‘den nafaka takdîr ettirmekle sagīre-i mezbûrenin hıdâne takrîbiyle âhar rü’yet edicek akreb ve akrabâsı olmamağla sagīre-i mezbûrenin ben hâli olup bilâ-nafaka ve lâ-münfik kendi mâlımdan teberruʻan infâk ve iksâ etmek üzere sagīre-i mezbûreyi bana teslîme tenbîh olunmak matlûbumdur dedikde hâl fi’l-hakīka mezbûr Yusuf’un bâlâda takrîri vâkıʻa mutâbık idiği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver mütebeyyen oldukdan sonra ber-vech-i muharrer mezbûr Yusuf kendi mâlından teberruʻan sagīre-i mezbûre hakkında her vechile infâk ve iksâ evlâ ve enfa‘ olmağla hâkim-i muvakki‘-ı sadr-ı kitâb tûbâ-lehû ve hüsnü-meâb efendi hazretleri dahi sagīre-i mezbûreyi mezbûr Yusuf’a teslîme merkūme Afife Hatun’a tenbîh-birle mâ-vaka‘a bi’t-taleb ketb olundu. Fi’l-yevmi’s-sâdis min-Ramazani’l-mübârek sene 1158. Şuhûdü’l-hâl: Es-Seyyid Mehmed Çelebi b. es-Seyyid Mustafa, es-Seyyid Ahmed Çelebi b. es-Seyyid Mehmed, Hüseyin Çelebi b. Mehmed, Musa Bey, Mehmed Çelebi b. Abdullah.