Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 186 Hüküm no: 138 Orijinal metin no: [35a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Feyzullah Çelebi’nin vârislerinin terekeden hisselerini alarak zimmetlerini ibra etmeleri Havâss-ı Refîʻa kazâsı muzâ[fâ]tından kasaba-i Hasköy’de Südlüce’de Mahmud Ağa Mahallesi sâkinlerinden olup vilâyet-i Rumeli’nde Burgos kazâsında vefât eden Feyzullah Çelebi b. Hasan’ın verâseti zevce-i menkûha-i metrûkesi Zeyneb Hatun bt. İsmail ile li-ebeveyn er karındaşı Mustafa’ya ve li-ebeveyn [kız] karındaşları Fâtıma ve Ümmügülsüm nâm hatunlara ve tashîh-i meseleleri on altı sehmden olup sihâm-ı mezbûreden dört sehmi zevcesi mezbûre Zeyneb Hatun’a ve altı sehmi karındaşı merkūm Mustafa’ya ve üç sehmi kız karındaşları mezbûretân Fâtıma ve Ümmügülsüm nâm hatunlardan herbirine isâbeti tahakkukundan sonra mezbûr Mustafa ile zâtları ta‘rîf-i şer‘î ile mu‘arrefe olan mezbûretân Fâtıma ve Ümmügülsüm nâm hatunlar meclis-i şer‘-i şerîf-i enverde müteveffâ-i mezbûrun zevcesi ve terekesine bi’l-verâse vâzıʻatü’l-yed olan işbu râfiʻatü’l-kitâb mezbûre Zeyneb Hatun tarafından husûs-ı âti’l-beyânda tasdîka vekîl-i sâbitü’l-vekâlesi Mehmed Efendi b. Ali mahzarında herbiri bi’l-verâse ikrâr-ı tâm ve takrîr-i kelâm edip mûrisimiz müteveffâ-i mezbûrun terekesi tahrîr ve ba‘de ihrâci’l-mesârif ve’d-düyûn ber-mûceb-i defter-i kassâm tashîh-i merkūm üzere hissemize isâbet [eden] iki bin yüz seksen dokuz akçeyi vekîl-i merkūm Mehmed Efendi bize def‘ ve teslîm, biz dahi meblağ-ı mezbûru yedinden herbirimiz bi’l-verâse bi-kadri’l-hısas bi’t-tamam ahz u kabz eyledik, baʻde’l-yevm mûrisimiz müteveffâ-i mezbûrun terekesinden hâric ez-defter dâhil-i defter kalîl ü kesîr celîl ü hakīr ma‘lûm ve mechûle müte‘allika âmme-i mîrâs da‘vâsından müvekkile-i mezbûre Zeyneb Hatun ile işbu hâzır bi’l-meclis müvekkile-i mezbûrenin vâlidesi Fâtıma Hatun’un zimmetlerini ibrâ-i âmm-ı kātıʻu’n-nizâ‘la ibrâ ve ıskāt edip vechen mine’l-vücûh ve sebeben mine’l-esbâb husûs-ı mîrâsa müte‘allika katʻâ da‘vâ ve nizâ‘ımız yokdur dediklerinde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’l-âşir min-Şevvâli’l-mükerrem sene semân ve hamsîn ve mi’e ve elf. Şuhûdü’l-hâl: Yahya Çelebi b. Ali ve Mollâ Halil b. İbrahim, diğer Halil Efendi b. Ahmed Efendi el-Mukayyid, Ahmed Efendi b. Mustafa, es-Seyyid Mehmed b. es-Seyyid Mustafa, Ahmed Ağa b. Hamdi, Musa Bey.