Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 195 Hüküm no: 145 Orijinal metin no: [37a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Çelebi’nin vârislerinin kendilerine miras olarak intikal eden evi Camcı İbrahim Ağa’ya satmaları Medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Musa Çavuş Mahallesiʼnde sâkin iken bundan akdem vefât eden Mustafa Çelebi b. Osman’ın verâseti zevce-i menkûha-i metrûkesi Sâliha Hatun bt. İbrahim ile vâlidesi Havvâ Hatun bt. Ahmed’e ve li-ümmin kız karındaşları Hafize ve Fâtıma bintey İbrahim nâm hatunlara münhasıra ve tashîh-i meseleleri bi-tarîkı’r-reddiye on iki sehmden i‘tibâr olunup sihâm-ı mezbûreden üç sehmi zevcesi mezbûre Sâliha Hatun’a ve üç sehmi vâlidesi mezbûre Havvâ Hatun’a ve bâkī üçer sehmi mezbûretân Hafize ve Fâtıma nâm hatunlardan herbirine isâbeti tahakkukundan sonra zâtı ta‘rîf-i şer‘î ile muʻarrefe olan zevce-i mezbûre Sâliha nâm hatun asâleten ve müteveffâ-i mezbûrun vâlidesi merkūme Havvâ Hatun tarafından zikri âtî husûsda vekîl olduğu zât-ı mezbûreyi bi’l-ma‘rifeti’ş-şer‘iyye ârifân olan Hâfız Abdülgafur Efendi b. Ali ve Hamza Efendi b. Hüseyin nâm kimesneler şehâdetleriyle vekâleti sâbit olan İbrahim Ağa b. Ahmed vekâleten ve kezâlik mezbûre Hafize nâm hatunun zevci ve tarafından husûs-ı âti’l-beyânda vekîl olduğu zât-ı mezbûreyi bi’l-ma‘rifeti’ş-şer‘iyye ârifân Hâfız Abdülgafur Efendi b. Ali ve İbrahim Ağa b. Ahmed nâm kimesneler şehâdetleriyle vekâleti sâbit olan Hamza Efendi b. Hüseyin vekâleten ve kezâlik mezbûre Fâtıma Hatun’un zevci ve tarafından zikri âtî husûsda vekîl olduğu zât-ı mezbûreyi bi’l-ma‘rifeti’ş-şer‘iyye ârifân Hamza Efendi b. Hüseyin ve İbrahim Ağa b. Ahmed nâm kimesneler şehâdetleriyle vekâleti sâbit olan Hâfız Abdülgafur Efendi b. Ali vekâleten meclis-i şer‘-i şerîf-i enverde işbu râfiʻü’l-kitâb Camcı İbrahim Ağa b. el-Hâc Abdurrahman mahzarında herbiri bi’l-asâle ve’l-vekâle ikrâr-ı tâm ve takrîr-i kelâm edip müteveffâ-i mezbûrun ile’l-vefât yedinde mülk ve hakkı idiği müsbet olup mahalle-i mezbûrede vâki‘ bir tarafdan baʻzan İmâm Abdullah Efendi ve baʻzan Mukātaʻacızâde menzilleri ve bir tarafdan tarîk-i hâs ile mahdûd hâriciyyesinde iki bâb fevkānî oda ve bir köşk ve zât-ı eşcâr-ı müsmire ve gayr-ı müsmire bağçe ve dâhiliyesinde üç bâb fevkānî oda ve bir havuz ve bir matbah ve üç su kuyusu ve kenîf ve zât-ı eşcâr-ı müsmire ve gayr-ı müsmireli bağçeyi muhtevî mülk menzili tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile sekiz yüz beş guruşa bi’l-asâle ve’l-vekâle merkūm Camcı İbrahim Ağa’ya beyʻ ve temlîk ve teslîm eylediğimizde ol dahi ber-vech-i muharrer iştirâ ve temellük ve tesellüm ve kabûl ve kabz eylediğinden sonra işbu mahkûmun-bih hüccet-i şer‘iyye mûcebince menzil bahâsından Hadice ve Fâtıma ve Âişe nâm hatunların altı yüz elli beş guruş müteveffâ-i mezbûr Mustafa Çelebi zimmetinde hakları olmağla mezbûrât taraflarından işbu hâzır bi’l-meclis vekîl-i sâbitü’l-vekâle vekîlleri olan Mehmed Efendi b. Mehmed ve İbrahim Ağa b. Mehmed nâm kimesneler meblağ-ı mezbûru müşteri-i merkūm Camcı İbrahim Ağa’dan tamamen ahz u kabz etmek üzere meblağ-ı deyn-i mezkûr altı yüz elli beş guruşu bir meclisde havâle etmekle ânlar dahi havâle-i mezkûreyi baʻde’l-kabûl semen-i bâkī yüz elli guruşu müşteri-i merkūm Camcı İbrahim Ağa yedinden herbirimiz bi’l-asâle ve’l-vekâle bi-kadri’l-hısas bi’t-tamam ahz u kabz eyledik, baʻde’l-yevm menzil-i mahdûd-ı mezkûr merkūm Camcı İbrahim Ağa’nın mülk-i müşterâsı ve hakk-ı sırfı olmuşdur, keyfe mâ yeşâ ve yahtâr mutasarrıf olsun dediklerinde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’t-tâsiʻ aşer min-Şevvâli’l-mükerrem sene semân ve hamsîn ve mi’e ve elf. Şuhûdü’l-hâl: Mustafa Efendi b. Hüseyin, Ahmed Efendi b. Mustafa, Mehmed Said Efendi b. Mustafa, es-Seyyid Mustafa Efendi b. es-Seyyid Ahmed, Ahmed Ağa, Halil Efendi el-Mukayyid, Musa Bey.