Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 196 Hüküm no: 146 Orijinal metin no: [37b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mangalya bt. Yanaki’nin evini kızkardeşi Feringo bt. Yanaki’ye satması Husûs-ı âti’l-beyânın mahallinde ketb u tahrîri için savb-ı şer‘-i enverden Mevlânâ Ahmed Efendi b. Mustafa Efendi irsâl olunup ol dahi Havâss-ı Refîʻa kazâsına tâbi‘ Litros karyesinde mütemekkine Feringo? bt. Yanaki nâm Nasrâniye’nin menziline varıp zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî ettikde karye-i mezbûrede mütemekkine olup şahsı ta‘rîf-i şer‘î ile muʻarrafe olan Mangalya bt. Yanaki nâm Nasrâniye meclis-i ma‘kūd-ı mezkûrda kız karındaşı işbu râfiʻatü’s-sifr mezbûr Feringo bt. Yanaki nâm Nasrâniye muvâcehesinde ikrâr-ı tâm ve takrîr-i kelâm edip karye-i mezbûrede vâki‘ lede’l-ahâlî ve’l-cîrân ma‘lûmü’l-hudûd ve’l-müştemilât bir bâb fevkānî oda ve tahtında ahırı muhtevî mülk menzilimi cemî‘ tevâbiʻ ve levâhıkıyla tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile kız karındaşım mesfûr Feringo nâm Nasrâniye’ye doksan guruşa beyʻ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl ve kabz eylediğinden sonra semeni olan meblağ-ı mezbûr doksan guruşu kız karındaşım mesfûre Feringo nâm Nasrâniye yedinden bi’t-tamam ahz u kabz eyledim, baʻde’l-yevm menzil-i mezkûr kız karındaşım mesfûr Feringo nâm Nasrâniye’nin mülk-i müşterâsı ve hakk-ı sırfı olmuşdur, mutasarrıf olsun dedikde gıbbe’t-tasdîki’ş-şer‘î vâki‘ hâli mevlânâ-yı mezbûr mahallinde ketb u tahrîr, ba‘dehû ma‘an baʻs olunan ümenâ-i şer‘den Çukadâr Ahmed Ağa b. Hamdi Mehmed ve Muhzır es-Seyyid Mehmed b. es-Seyyid Mustafa ile meclis-i şer‘a gelip herbiri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’l-hâdî ve’l-ışrîn min-Şevvâli’l-mükerrem sene semân ve hamsîn ve mi’e ve elf. Şuhûdü’l-hâl: Yusuf Bölükbaşı b. Hüseyin, Ahmed Ağa [b.] Hamdi Mehmed, es-Seyyid Ahmed [b.] es-Seyyid Mehmed, Hüseyin Çelebi b. Mehmed, Mehmed Çelebi b. Abdullah. Acı Zafiri v. Miho v. Dükkâncı Nasko, Gogo v. ( ).