Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 202 Hüküm no: 152 Orijinal metin no: [39a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çorbacıoğlu diye bilinen Ahmed Beşe’nin küçük çocuklarının vasisine nazır tayin edilmesi Havâss-ı Refîʻa kazâsı muzâfâtından Terkos nâhiyesine tâbi‘ Ağaçlı karyesinde sâkin iken bundan akdem vefât eden Çorbacıoğlu demekle ma‘rûf Ahmed Beşe b. Ahmed’in sulbiye sagīre kızları Rukiye ve Ümmügülsüm’ün tesviye-i emirlerine ve müteveffâ-i mezbûrun zevcesi Âişe Hatun bt. Halil’in batnında müstebîn hamlin hisse-i irsiyyesini ahz u kabz zabt u hıfza kıbel-i şer‘den bâ-hüccet-i şer‘iyye vasîleri olan Ahmed Beşe b. Mehmed nâm kimesnenin üzerine kıbel-i şer‘den bir hasbî nâzır nasbı lâzım ve mühim olmağın emânet ile ma‘rûf ve her vechile nezâret uhdesinden gelmeğe kādir idiği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olan sagīretân-ı mezbûretânın hâli işbu râfiʻü’l-kitâb Mehmed Beşe b. Halil’i hâkim-i muvakki‘-ı sadr-ı kitâb tûbâ-lehû ve hüsnü-meâb efendi hazretleri vasiyy-i merkūm Ahmed Beşe üzerine hasbî nâzır nasb u ta‘yîn buyurduklarında ol dahi vech-i muharrer nezâret-i mezbûreyi kabûl ve hizmet-i lâzımesin kemâ-yenbagī edâya taʻahhüd ve iltizâm etmeğin mâ-vaka‘a bi’t-taleb ketb olundu. Fi’l-yevmi’l-hâmis ve’l-ışrîn min-Şevvâli’l-mükerrem li-sene semân ve hamsîn ve mi’e ve elf. Şuhûdü’l-hâl: Mollâ Yusuf b. Veliyüddin, İbrahim Beşe b. İsmail, diğer İbrahim Çelebi b. Halil, Mehmed Kethüdâ b. Abdullah, es-Seyyid Abdülhalim b. es-Seyyid Ömer, es-Seyyid Ahmed b. es-Seyyid Mehmed.