Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 202 Hüküm no: 153 Orijinal metin no: [39a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çorbacıoğlu Ahmed Beşe’nin küçük çocuklarına eniştelerinin vasi tayin edilmesi Havâss-ı Refîʻa kazâsı muzâfâtından Terkos nâhiyesine tâbi‘ Ağaçlı karyesinde sâkin iken bundan akdem vefât eden Çorbacıoğlu demekle ma‘rûf Ahmed Beşe b. Ahmed’in sulbiye sagīre kızları Rukiye ve Ümmügülsüm’ün tesviye-i emirlerine ve müteveffâ-i mezbûrun zevcesi Âişe Hatun bt. Halil’in batnında müstebîn hamlin hisse-i irsiyyesini ahz u kabz zabt u hıfza kıbel-i şer‘den bir vasî nasbı lâzım ve mühim olmağın emânet ile ma‘rûf ve diyânet ile mevsûf her vechile vesâyet uhdesinden gelmeğe kādir idiği sagīretân-ı mezbûretânın vâlideleri mezbûre Âişe Hatun ile zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olan sagīretân-ı mezbûretânın enişteleri işbu râfiʻü’l-kitâb Ahmed Beşe b. Mehmed nâm kimesneyi hâkim-i muvakki‘-ı sadr-ı kitâb tûbâ-lehû ve hüsnü-meâb efendi hazretleri sagīretân-ı mezbûretânın tesviye-i emirlerine ve zevce-i mezbûrenin batnında müstebîn hamlin hisse-i irsiyyesini ahz u kabz zabt u hıfza vasî nasb u ta‘yîn buyurduklarında ol dahi ber-vech-i muharrer vesâyet-i mezbûreyi kabûl ve hizmet-i lâzımesin kemâ-yenbagī edâya taʻahhüd ve iltizâm etmeğin mâ-vaka‘a bi’t-taleb ketb olundu. Fi’l-yevmi’l-hâmis ve’l-ışrîn min-Şevvâli’l-mükerrem li-sene semân ve hamsîn ve mi’e ve elf. Şuhûdü’l-hâl: Şâhidûn-ı sâbıkūn.