Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 203 Hüküm no: 154 Orijinal metin no: [39a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bostancı Mehmed’in vârislerinden olan kardeşi Osman’ın diğer vârislerce terekeden eşya gizlendiği iddiası Havâss-ı Refîʻa kazâsı muzâfâtından Terkos nâhiyesine tâbi‘ Hacı Mihaliç karyesinde sâkin iken bundan akdem vefât eden Bostanî Mehmed b. Abdullah’ın verâseti zevce-i menkûha-i metrûkesi Âişe bt. el-Hâc Ahmed ile vâlidesi Ümmügülsüm Hatun bt. Mustafa ve li-ebeveyn er karındaşı Osman’a münhasıra olduğu şer‘an zâhir ve müteʻayyen oldukdan sonra mezbûr Osman tarafından zikri âtî husûs-ı da‘vâya müseccel vekîl-i şer‘îsi olan Hüseyin Haseki b. Hasan meclis-i şer‘-i şerîf-i enverde müteveffâ-i mezbûrun terekesine bi’l-verâse vâzıʻayi’l-yed işbu sâhibü’l-kitâb mezbûretân Âişe ve Ümmügülsüm nâm hatunlar ile işbu hâzır bi’l-meclis el-Hâc Ahmed b. Mehmed mahzarlarında üzerlerine da‘vâ ve takrîr-i kelâm edip mûrisimiz müteveffâ-i mezbûr Bostanî Mehmed’in hâric ez-defter terekesinden yüz elli guruş kıymetli bir sepet sandık ve iki havlu makrame ve iki aş makramesi ve bir sim bıçak ve bir sim yüzük ve üç fağfûrî fincan ma‘a zarf ve bir kahve ibriği ve bir kîse ve iki kelle-pûş ve bir kalpak ve hamam rahtı ve iki çakşır ve iki kırmızı çuka sâye biniş ve bir çuka dolama ve bir su tası ve iki kat ma‘lûmü’l-kıyme libâs ve dört kat çamâşûr ve iki Sakız şalı ve iki Mağrib kuşağı ve bir kemer kuşak ve bir Engürü? şevari? ve iki yağmurluk ve iki çift cedîd papuç ve bir çizme ve altı karasığır ineği ve bir öküz ve bir döşek ve bir yorgan ve bir yasdık ve bir atlı kebesi ve iki kilim ve bir bârgir ve bir yatağan ve bir yüz yasdığı ketm ve ihtifâ edip ve lede’l-ahâlî ma‘lûmü’l-hudûd kürûmî mülk dört dönüm bağı dahi benim mülkümdür deyü inkâr etmekle mezbûretân Âişe ve Ümmügülsüm nâm hatunlar ile merkūm el-Hâc Ahmed’den suâl olunup defter-i kassâma idhâl olunmak üzere alıverilmesi murâdımdır dedikde gıbbe’s-suâl ve akībe’l-inkâr müdde‘î-i mezbûrdan müddeʻâsına mutâbıka beyyine taleb olundukda baʻde’l-imhâl ve’l-istimhâl müddet-i medîd ityân-ı beyyineden izhâr-ı acz etmeğin husûs-ı mezbûr için mezbûretân Âişe ve Ümmügülsüm ile mezbûr el-Hâc Ahmed’den herbiri ba‘de’t-tahlîfü’ş-şer‘î müdde‘î vekîl-i mezbûr Hüseyin Haseki bilâ-beyyine bî-vech mu‘ârazadan men‘ ve def‘-birle mâ-vaka‘a bi’t-taleb ketb olundu. Fi’l-yevmi’s-sânî min-Zilkaʻdeti’ş-şerîfe sene semân ve hamsîn ve mi’e ve elf. Şuhûdü’l-hâl: Mehmed Said Efendi b. İbrahim, es-Seyyid Mustafa Efendi [b.] es-Seyyid Ahmed, es-Seyyid Mehmed [b.] es-Seyyid Mustafa, es-Seyyid Ahmed [b.] es-Seyyid Mehmed, Halil Efendi el-Mukayyid.