Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 207 Hüküm no: 156 Orijinal metin no: [40a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çorbacıoğlu Ahmed Beşe’nin terekesinden küçük çocuklarına nafaka tayin edilmesi Havâss-ı Refîʻa kazâsına tâbi‘ Ağaçlı nâm karyede sâkin iken bundan akdem vefât eden Çorbacıoğlu demekle ma‘rûf Ahmed Beşe b. Ahmed’in sulbiye sagīre kızları Rukiye ve Ümmügülsüm’ün tesviye-i emirlerine bâ-hüccet-i şer‘iyye vasîleri olan işbu râfiʻü’l-kitâb Ahmed Beşe b. Mehmed meclis-i şer‘-i şerîf-i enverde takrîr-i kelâm ve tâʻbir ani’l-merâm edip vasîleri olduğum sagīretân-ı mezbûretânın nafaka ve kisve-bahâya eşedd-i ihtiyâçları olmağla babaları müteveffâ-i mezbûrdan müntakil mâl-ı mevrûslarından herbirine kadr-i ma‘rûf nafaka ve kisve-bahâ farz ve takdîr olunmak matlûbumdur dedikde vasiyy-i mezbûrun kelimât-ı meşrûhası vâkıʻa mutâbık idiği lede’ş-şer‘i’l-enver zâhir ve mukarrer olmağın hâkim-i muvakki‘-ı sadr-ı kitâb tûbâ-lehû ve hüsnü-meâb efendi hazretleri sagīretân-ı mezbûretânın babaları müteveffâ-i mezbûrdan müntakil mâl-ı mevrûslarından herbirine beher yevm dörder akçe nafaka ve kisve-bahâ farz ve takdîr buyurup meblağ-ı mefrûz-ı mezbûru sagīretân-ı mezbûretânın nafaka ve kisve-bahâlarına harc u sarfa ve lede’l-iktizâ istidâneye ve inde’z-zafer mâllarına rücû‘a vasiyy-i mezbûr Ahmed Beşe’ye izin vermeğin mâ-vaka‘a bi’t-taleb ketb olundu. Fi’l-yevmi’l-hâmis ve’l-ışrîn min-Şevvâli’l-mükerrem li-sene semân ve hamsîn ve mi’e ve elf. Şuhûdü’l-hâl: Mollâ Yusuf b. Veliyüddin, İbrahim Beşe b. İsmail, diğer İbrahim Çelebi b. Halil, Mehmed Kethüdâ b. Abdullah, es-Seyyid Abdülhalim Ağa b. es-Seyyid Ömer.