Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 207 Hüküm no: 157 Orijinal metin no: [40a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kirko v. Niko adlı bahçıvanın vasiyeti ve bunu uygulamak üzere oğlu Vesinyo’yu vasi tayin etmesi Husûs-ı âti’l-beyânın mahallinde ketb u tahrîri için savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Cezerî Kasım Mahallesiʼnde vâki‘ Hıristo nâm zimmînin bağçesine varıp zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî ettikde Topkapısı hâricinde vâki‘ Kara Mustafa Paşa bağçesi demekle ma‘rûf bağçede mütemekkin Kirko v. Niko nâm bahçıvân tarafından husûs-ı âti’l-beyânda vekîl olduğu Aleksi v. Lefter ve Miho v. Simo şehâdetleriyle şer‘an vekâleti sâbit olan Yano v. Miho nâm zimmî meclis-i ma‘kūd-ı mezkûrda müvekkil-i mesfûrun sulbî kebîr oğlu işbu râfiʻü’s-sifr Vesinyo muvâcehesinde bi’l-vekâle ikrâr-ı tâm ve takrîr-i kelâm edip müvekkilim mesfûr Kirko beni, ben bi-emri’llâhi te‘âlâ hâlik olduğumda cemî‘ terekem ve zimem-i nâsda olan hukūkum ahz u kabz olunup kadr-i ma‘rûf akçe ile lâşem zîr-i hâke ilkā-i hafr için harc u sarf oluna ve bâkī kalan terekemden vilâyet-i Rumeli’nde Premedi kazâsına tâbi‘ Ogodinin? karyesinde sâkine zevcem Göle? bt. Hıristo nâm Nasrâniye’nin sümün hissesi îsâl oluna ve bâkī terekemi dahi oğullarım beynlerinde taksîm oluna deyü vasiyyet ve tenfîzine işbu oğlu mesfûr Vesinyo nâm zimmîyi vasiyy-i muhtâr nasb u ta‘yîn eylediğinde ol dahi ber-vech-i muharrer vesâyet-i mezbûreyi muvâcehesinde baʻde’l-kabûl ve hizmet-i lâzımesini edâya taʻahhüd eyledi dedi dedikde gıbbe’t-tasdîki’ş-şer‘î vâki‘ hâli mevlânâ-yı mezbûr mahallinde ketb u tahrîr ba‘dehû ma‘an baʻs olunan Çukadâr Ahmed Ağa b. Hamdi ve es-Seyyid Ahmed b. es-Seyyid Mustafa ile meclis-i şer‘a gelip herbiri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sânî aşer min-Zilkaʻdeti’ş-şerîfe sene semân ve hamsîn ve mi’e ve elf. Şuhûdü’l-hâl: Mustafa Beşe b. Hasan, es-Seyyid Mehmed [b.] es-Seyyid Mustafa, Ahmed Efendi b. Mustafa, Halil Çelebi b. İbrahim, Hüseyin Çelebi b. Mehmed. Yano v. Miho, Efti v. Kosta, Hıristo v. Miço, Kano v. Kosta, Hıristo v. Simo.