Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 208 Hüküm no: 158 Orijinal metin no: [40b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dergâh-ı âlî yeniçerilerinden vefât eden Mustafa Ağa’nın küçük oğlu Ali’nin vasiyyesi olan annesi Fâtıma Hatun üzerine amcazâdesi Mustafa Ağa’nın nazır tayin edilmesi Havâss-ı Refîʻa kazâsı muzâfâtından Terkos nâhiyesine tâbi‘ Ormanlı karyesi ahâlîsinden Dergâh-ı âlî -dâme mahfûfen bi’l-maʻâlî- yeniçerilerinin ellinci bölük ortasında sâbıkā çorbacı mütekāʻidlerinden olup bundan akdem vefât eden Mustafa Ağa b. Hasan’ın sulbî sagīr oğlu Ali’nin vâlidesi ve tesviye-i umûruna bâ-hüccet-i şer‘iyye mansûbe vasiyyesi olan Fâtıma Hatun bt. Abdullah’ın üzerine kıbel-i şer‘den bir hasbî nâzır nasbı lâzım ve mühim olmağın emânet ile ma‘rûf ve her vechile nezâret uhdesinden gelmeğe kādir idiği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olan sagīr-i mezbûrun ammizâdesi işbu râfiʻü’l-kitâb Mustafa Ağa b. İbrahim hâkim-i muvakki‘-ı sadr-ı kitâb tûbâ-lehû ve hüsnü-meâb efendi hazretleri vasiyye-i mezbûre Fâtıma nâm hatun üzerine hasbî nâzır nasb u ta‘yîn buyurduklarında ol dahi ber-vech-i muharrer nezâret-i mezbûreyi kabûl ve hizmet-i lâzımesin kemâ-yenbagī edâya taʻahhüd ve iltizâm etmeğin mâ-vaka‘a bi’t-taleb ketb olundu. Fi’l-yevmi’l-hâdî aşer min-Zilkaʻdeti’ş-şerîfe sene semân ve hamsîn ve mi’e ve elf. Şuhûdü’l-hâl: Ahmed Efendi el-İmâm der-karye, Mehmed Efendi [b.] Ali der-karye-i mezbûr, Ali el-İmâm, Mustafa b. Memiş, Müezzin Mollâ Mustafa b. Mehmed.