Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 209 Hüküm no: 159 Orijinal metin no: [40b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dergâh-ı âlî yeniçerilerinden Hafız İbrahim Odabaşı’nın vârislerinin terekeden hisselerini almaları Dergâh-ı âlî -dâme mahfûfen bi’l-maʻâlî- yeniçerilerinin yirmi altıncı cemâʻat odasının mütekāʻidlerinden olup medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Zal Paşa Medresesi’nde sâkin iken bundan akdem vefât eden Hâfız İbrahim Odabaşı b. Ali’nin verâseti li-ebeveyn ammioğlu el-Hâc Ahmed Beşe b. el-Hâc Mehmed ile vilâyet-i Anadolu’da Amasya kasabasında sâkine li-ebeveyn kız karındaşı Zahide Hatun’a münhasıra olduğu şer‘an zâhir ve müteʻayyen oldukdan sonra merkūme Zahide Hatun tarafından husûs-ı âti’l-beyânda vekîl olduğu zât-ı mezbûreyi bi’l-ma‘rifeti’ş-şer‘iyye ârifân olan es-Seyyid İbrahim b. es-Seyyid Ahmed ve Osman Çelebi b. Hasan nâm kimesneler şehâdetleriyle vekâleti sâbit olan zevci es-Seyyid Osman b. es-Seyyid Ali ile merkūm el-Hâc Ahmed meclis-i şer‘-i şerîf-i enverde müteveffâ-i mezbûrun sülüsünü tenfîze vasiyy-i muhtârı olup tereke-i müteveffâ-i mezbûra bi’l-vesâye vâzıʻu’l-yed olan işbu râfiʻü’l-kitâb İsmail Efendi b. Veli mahzarında herbiri bi’l-asâle ve’l-vekâle ikrâr-ı tâm ve takrîr-i kelâm edip mûrisimiz müteveffâ-i mezbûrun terekesi tahrîr ve ba‘de ihrâci’l-mesârif ve’s-sülüs ber-mûceb-i defter-i kassâm hissemize isâbet eden on bir bin yedi yüz kırk dört akçeyi terekeden olmak üzere vasiyy-i merkūm İsmail Efendi bize def‘ ve teslîm, biz dahi ber-vech-i muharrer meblağ-ı mezbûru bi’l-asâle ve’l-vekâle yedinden bi’t-tamam ve’l-kemâl ahz u kabz eyledik, baʻde’l-yevm müteveffâ-i mezbûrun terekesine müte‘allika âmme-i mîrâs da‘vâsından vasiyy-i merkūm İsmail Efendi’nin zimmetini herbirimiz bi’l-asâle ve’l-vekâle ibrâ-i âmm-ı kātıʻu’n-nizâ‘la ibrâ ve ıskāt edip vechen mine’l-vücûh ve sebeben mine’l-esbâb husûs-ı mîrâsa müte‘allika katʻâ da‘vâ ve nizâ‘ım yokdur dediklerinde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis aşer min-Zilkaʻdeti’ş-şerîfe sene semân ve hamsîn ve mi’e ve elf. Şuhûdü’l-hâl: Ahmed Efendi b. Mustafa, el-Hâc Ahmed Efendi, el-Hâc Ali b. Hasan Efendi, Ahmed Efendi, Derviş Ahmed b. Mahmud.