Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 209 Hüküm no: 160 Orijinal metin no: [40b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Papa Dimitri’nin ölümüyle küçük oğlu Yanaki’ye intikal eden dükkanın vasisi tarafından satılmasına izin verilmesi Havâss-ı Refîʻa kazâsına tâbi‘ Burgos karyesinde mütemekkin iken bundan akdem hâlik olan Papa Dimitri v. Tarandafil zimmînin sulbî sagīr oğlu Yanaki’nin ammisi ve tesviye-i umûruna bâ-hüccet-i şer‘iyye vasîsi olan işbu râfiʻü’s-sifr Yorgo v. Tarandafil nâm zimmî meclis-i şer‘-i şerîf-i enverde takrîr-i kelâm ve tâʻbir ani’l-merâm edip karye-i mezbûrede vâki‘ lede’l-ahâlî ve’l-cîrân ma‘lûmü’l-hudûd ve’l-müştemilât bir bâb dükkân vasîsi olduğum sagīr-i mezbûrun babası hâlik-i mezbûrdan müntakil mülk-i mevrûsu olup lâkin dükkân-ı mahdûd-ı mezkûr harâba müşrif olup hâsılı harcına vefâ etmeyip ta‘mîr ve termîmine dahi bir vechile iktidârı olmamağla dükkân-ı mahdûd-ı mezkûru sûk-ı sultânîde baʻde’l-müzâyede ve [i]nkıtâʻi’r-rağbe semen-i misliyle âhara beyʻ ve semeni istirbâh olunmak sagīr-i mezbûr hakkında her vechile enfa‘ ve evlâ olmağla dükkân-ı mahdûd-ı mezkûru âhara beyʻa kıbel-i şer‘den izin verilmek matlûbumdur dedikde vasiyy-i mezbûrun kelimât-ı meşrûhası vâkıʻa mutâbık idiği zeyl-i kitâbda muharrerü’l-esâmî Müslimîn ihbârıyla [41a] lede’ş-şer‘i’l-enver zâhir ve mukarrer olan hâkim-i muvakki‘-ı sadr-ı kitâb tûbâ-lehû ve hüsnü-meâb efendi hazretleri dükkân-ı mahdûd-ı mezkûru ber-vech-i muharrer sûk-ı sultânîde baʻde’l-müzâyede ve inkıtâʻi’r-rağbe semen-i misliyle âhara beyʻe ve semeni istirbâh olunmak üzere vasiyy-i mezbûra izin vermeğin mâ-vaka‘a bi’t-taleb ketb olundu. Fi’l-yevmi’s-sâlis aşer min-Zilkaʻdeti’ş-şerîfe sene semân ve hamsîn ve mi’e ve elf. Şuhûdü’l-hâl: Es-Seyyid Mehmed b. es-Seyyid Mustafa, es-Seyyid Ahmed [b.] es-Seyyid Mehmed, Halil Çelebi [b.] İbrahim, Hüseyin Çelebi [b.] Mehmed, Ahmed Ağa [b.] Hamdi Mehmed, Halil Efendi el-Mukayyid.