Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 210 Hüküm no: 161 Orijinal metin no: [41a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ormanlı köyünden Mustafa Ağa’nın vârislerine taksim edilen terekesi Dergâh-ı âlî -dâme mahfûfen bi’l-maʻâlî- yeniçerilerinin ellinci bölük ortasında sâbıkā çorbacı mütekāʻidlerinden olup Havâss-ı Refîʻa kazâsı muzâfâtından Terkos nâhiyesine tâbi‘ Ormanlı karyesi ahâlîsinden iken bundan akdem vefât eden Mustafa Ağa b. Hasan’ın verâseti zevce-i menkûha-i metrûkesi Fâtıma Hatun bt. Abdullah ile sulbî sagīr oğlu Ali’ye münhasıra olduğu şer‘an zâhir ve müteʻayyen oldukdan sonra sagīr-i mezbûrun vâlidesi ve tesviye-i umûrlarına mansûbe vasiyyesi olan mezbûre Fâtıma Hatun tarafından vekîl-i sâbitü’l-vekâlesi olan Ahmed Ağa b. Mustafa vasiyye-i mezbûre Fâtıma Hatun’un üzerine bâ-hüccet-i şer‘iyye hasbî nâzırı olan sagīr-i mezbûrun ammizâdesi Mustafa Ağa b. İbrahim taleb ve ma‘rifetleriyle tahrîr ve taksîm olunan tereke-i müteveffâ-i mezbûrdur ki ber-vech-i âtî zikr olunur. Fi’l-yevmi’l-hâdî aşer min-Zilkaʻde sene semân ve hamsîn ve mi’e ve elf. #&# Abraş camus inek 1, ma‘a malak 1 3.600 akçe Def‘a camus inek 1, ma‘a malak 1 3.600 akçe Kara sığır ineği 1, ma‘a malak 1 1.800 akçe Kara sığır ineği 1, ma‘a malak 1 1.500 akçe Kara sığır düğesi, tosun 1.920 akçe Camus düğesi 1, ma‘a inek 2 6.600 akçe Camus öküzü, 1 çift 5.400 akçe Kara sığır öküzü, 1 çift 3.600 akçe Kısrak 1, ma‘a tay 2 1.200 akçe Camus düğesi, 1 1.200 akçe Kapı perdesi, 1 200 akçe Köhne çuka kesme, 1 300 akçe Def‘a çuka kesme, 1 600 akçe Kaliçe makʻada, 2 480 akçe Orta keçesi, 1 400 akçe Kilim, 1 420 akçe Def‘a kilim, 1 900 akçe Kaliçe makʻada, 1 420 akçe Köhne beylik makʻad, 2 365 akçe Çuka makʻada, 3 600 akçe Köhne yemenî makʻada, 5 600 akçe Def‘a köhne yemenî makʻada 2, ma‘a köhne ihrâm 1 240 akçe Köhne kapı perdesi, 1 69 akçe Def‘a köhne kapı perdesi, 1 120 akçe Köhne seccâde, 1 93 akçe Köhne hâşe, 2 160 akçe Köhne kavuk 39 akçe Köhne nâfe kürk, 1 540 akçe Nimten kuzu kürkü, 1 240 akçe Nâfe kontuş yeşil çuka kürk, 1 2.200 akçe Köhne kaliçe, 1 150 akçe Köhne kilim, 1 300 akçe At çulu, 1 303 akçe Köhne destâr 315 akçe Def‘a köhne destâr 24 akçe Def‘a köhne destâr 315 akçe Def‘a köhne destâr 25 akçe Köhne yağlık ma‘a sagīr boğ[ça] 60 akçe Köhne yan keçesi, 1 33 akçe Yorgan ma‘a çarşeb 200 akçe Def‘a köhne yorgan, 1 75 akçe Köhne tülbend örtüsü, 1 30 akçe Çakşır, 1 800 akçe Köhne uçkur, 1 20 akçe Alaca anteri, 1 969 akçe Kırmızı çuka biniş, 1 975 akçe Köhne çakşır 130 akçe Köhne çakşır 100 akçe Boğça 27 akçe Köhne zıbın 27 akçe Def‘a köhne zıbın, 1 60 akçe Köhne kırmızı kutnî kaftan, 1 141 akçe Köhne alaca zıbın 450 akçe Bogasi kırmızı kaban 303 akçe Simlice kılıç 1.500 akçe Simlice gaddâre 1, ma‘a külünk 1 600 akçe Palaska ma‘a vezne makrame kîsesi 165 akçe Köhne düğme sandal yorgan ve çarşeb 720 akçe Gömlek 1, ma‘a don 1 120 akçe Def‘a gömlek 1, ma‘a don 1 273 akçe Enʻâm-ı şerîf, 1 15 akçe Köhne kuşak, 1 40 akçe Köhne tülbend örtüsü ma‘a yüz yasdığı yüzü 90 akçe Mâî köhne çuka yağmurluk 855 akçe Beledî döşek, 1 303 akçe Yüz yasdığı ma‘a baş yasdığı, 2 50 akçe Def‘a köhne yüz yasdığı, 2 12 akçe Kumaş yasdık, 8 960 akçe Köhne kadife yasdık, 4 480 akçe Def‘a köhne kadife yasdığı, 2 200 akçe Def‘a köhne kadife yasdık 60 akçe Minder, 3 820 akçe Yol tâbesi, 1 105 akçe Halebî tas, 1 50 akçe Bakraç, 1 306 akçe Şamʻdân, 1 75 akçe Def‘a kebîr bakraç 300 akçe [41b] Tencere ma‘a kapak, 1 270 akçe Kefkir, 1 50 akçe Tüfenk, 1 330 akçe Kazgan, 12 kıyye 1.200 akçe Üzengi, 1 çift 240 akçe Mankal demir, 1 330 akçe Eğer, 1 203 akçe Def‘a köhne eğer, 2 125 akçe Bilek 300 akçe Evânî-i nuhâs 140 kıyye, fî: 100 14.000 akçe Otluk, 6 tepe 9.240 akçe Def‘a otluk, 2 tepe 3.000 akçe Saman, 6 çit 960 akçe Testere 2, yularlı keser 1 ve burgu ve eğe demiri 2 ve bıçkı 1 ve dirgen 180 akçe Demir üzengi, 1 çift 15 akçe Sadefkârî iskemle, 1 100 akçe Def‘a sadefkârî iskemle 100 akçe Köhne sofra ma‘a peşkir, 1 90 akçe Minder 2 ma‘a yemenî yasdık 1 ve çuka yasdık 6 ve köhne yeşil bilek makʻada ve beyâz ihrâm ve beledî döşek 1 ve meşin sofra 1 ve kapı perdesi 1 ve Mısır hasırı 1 ve yorgan 2 ma‘a çarşeb ve döşek 2, çarşebi 1 ve beyâz ihrâm 1 2.880 akçe Hınta, 20 keyl 1.200 akçe Leğen, 1 200 akçe İbrik 100 akçe Kahve ibriği 60 akçe Maşraba 120 akçe Minder, 1 300 akçe Beledî döşek 560 akçe Kaliçe seccâde, 1 400 akçe Def‘a seccâde, 1 360 akçe Kırmızı şilte, 1 360 akçe Köhne kilim, 2 180 akçe Köhne makʻad, 1 30 akçe Def‘a köhne çuka makʻad 30 akçe Baş yasdığı, 1 300 akçe Köhne orta kilim, 1 500 akçe Def‘a orta kilim, 1 720 akçe Köhne seccâde 80 akçe Minder, 6 2.000 akçe Mısır hasırı, 4 600 akçe Dakīk, 15 keyl 900 akçe Şamʻdân, 1 120 akçe Saç ayak, 1 30 akçe Mum sofrası, 1 30 akçe Demir mankal kurâde, 1 60 akçe Araba ma‘a saban demiri ma‘a şene 360 akçe Kebîr kantar, 1 60 akçe Düğen ma‘a hırdavât-ı menzil 1.000 akçe Cem‘an yekûn: 99.940 akçe. Yalnız doksan dokuz bin dokuz yüz kırk akçedir. 84.000 akçe. Çiftlik tâʻbir olunur menzil, ber-vech-i tahmîn. #&# Minhâ el-ihrâcât: Techîz, tekfîn ve ıskāt-ı salât ve ta‘mîr-i kabr ber-mûceb-i vasiyyet 5.340 akçe Deyn-i müsbet-i mehr-i müeccel bâ-hüccet-i şer‘iyye 12.000 akçe Deyn-i müsbet-i mâl-ı vakf 1.200 akçe Deyn-i Ali 360 akçe Deyn-i tekâlif 480 akçe Resm-i âdî ve kassâmiye 4.560 akçe Karye-i mezbûra giden kâtibe ücret-i kalemiye 1.440 akçe Çukadâriye 900 akçe İhzâriye 720 akçe Dellâliye-i eşyâ 2.400 akçe Ücret-i bârgir 1.080 akçe Kaydiye-i defter ve hüccet 300 akçe Harc-ı hüccet-i vesâyet ve nafaka ve nezâret 1.200 akçe Düyûn-ı müteferrika ve taʻâmiye ve harc-ı kahve ve deyn-i teberru ve sâir mesârif-i lâzıme 1.800 akçe Sahhe’l-bâkī li’t-taksîm beyne’l-verese: 66.155 akçe. Mine’l-eşyâ. 84.000 akçe. Bâlâda mezkûr menzil. Hissetü’z-zevceti’l-mezbûre 8.268 akçe. Mine’l-eşyâ 10.500 akçe. Mine’l-menzil Hissetü’l-ibni’l-mezbûr 57.882 akçe. Mine’l-eşyâ 73.500 akçe. Mine’l-menzil Müteveffâ-yı mezbûrun zevcesi mezbûre Fâtıma Hatun meclis-i şer‘de zevcim müteveffâ-i mezbûr Mustafa Ağa işbu mu‘âyene ve müşâhede olunan altı kıt‘a yasdık ve dört beledî yasdık ve dört minder zevcim müteveffâ-i mezbûr hayâtında bana hibe ve temlîk ve teslîm eyledi deyü da‘vâ ettikde mezbûre Fâtıma Hatun şâhide havâle olunduğu işbu mahalle şerh verildi.