Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 214 Hüküm no: 162 Orijinal metin no: [42a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Afife Hatun’un küçük kızı Sabiha’nın vefât eden vasisi Sâliha Hatun’un yerine dedesi Abdülfettâh Efendi’nin tayin edilmesi Medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Düğmeciler Mahallesiʼnde sâkine iken bundan akdem vefât eden Afife Hatun bt. Mustafa’nın sadriye sagīre kızı Sabiha bt. Mustafa’nın min-kıbeli’l-üm ceddesi ve tesviye-i umûruna bâ-hüccet-i şer‘iyye vasiyyesi olan Sâliha Hatun bt. Abdullah fevt olmağla vesâyet-i mezkûre hâlî ve muʻattal kalmağla sagīre-i mezbûrenin tesviye-i umûruna kıbel-i şer‘den bir vasî nasbı lâzım ve mühim olmağla emânet ile ma‘rûf ve diyânet ile mevsûf her vechile vesâyet uhdesinden gelmeğe kādir idiği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olan sagīre-i mezbûrenin min-kıbeli’l-eb ceddi işbu râfiʻü’l-kitâb Abdülfettâh Efendi b. Mustafa’yı hâkim-i muvakki‘-ı sadr-ı kitâb tûbâ-lehû ve hüsnü-meâb efendi hazretleri sagīre-i mezbûrenin tesviye-i umûruna vasî nasb u ta‘yîn buyurduklarında ol dahi ber-vech-i muharrer vesâyet-i mezbûreyi kabûl ve hizmet-i lâzımesin kemâ-yenbagī edâya taʻahhüd etmeğin mâ-vaka‘a bi’t-taleb ketb olundu. Fi’l-yevmi’l-hâmis aşer min-Şaʻbân sene semân ve hamsîn ve mi’e ve elf. Şuhûdü’l-hâl: Ahmed Efendi b. Mustafa, es-Seyyid Mehmed [b.] es-Seyyid Mustafa, Ahmed Ağa [b.] Hamdi Mehmed, es-Seyyid Ahmed [b.] es-Seyyid Mehmed, Hüseyin Çelebi b. Mehmed.