Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 215 Hüküm no: 163 Orijinal metin no: [42a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dergâh-ı âlî yeniçerilerinden vefât eden Mustafa Ağa’nın küçük oğlu Ali’ye annesi Fâtıma Hatun’un vasi tayin edilmesi Dergâh-ı âlî -dâme mahfûfen bi’l-maʻâlî- yeniçerilerinin ellinci bölük ortasının sâbıkā çorbacı mütekāʻidlerinden olup Havâss-ı Refîʻa kazâsı muzâfâtından Terkos nâhiyesine tâbi‘ Ormanlı karyesinde sâkin iken bundan akdem vefât eden Mustafa Ağa b. Hasan’ın sulbî sagīr oğlu Ali’nin tesviye-i umûruna kıbel-i şer‘den bir vasî nasbı lâzım ve mühim olmağın emânet ile ma‘rûfe ve diyânet ile mevsûfe ve her vechile vesâyet uhdesinden gelmeğe kādire idiği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olan sagīr-i mezbûrun vâlidesi işbu râfiʻü’l-kitâb Fâtıma Hatun bt. Abdullah’ı hâkim-i muvakki‘-ı sadr-ı kitâb tûbâ-lehû ve hüsnü-meâb efendi hazretleri sagīr-i mezbûrun tesviye-i umûruna vasî nasb u ta‘yîn buyurduklarında ol dahi ber-vech-i muharrer vesâyet-i mezbûreyi kabûl ve hizmet-i lâzımesin kemâ-yenbagī edâya taʻahhüd ve iltizâm etmeğin mâ-vaka‘a bi’t-taleb ketb olundu. Fi’l-yevmi’l-hâdî aşer min-Zilkaʻdeti’ş-şerîfe sene semân ve hamsîn ve mi’e ve elf. Şuhûdü’l-hâl: Ahmed Efendi el-İmâm der-karye-i Karaca, Mehmed Efendi der-karye-i mezbûr, Mustafa Beşe b. Memiş, Müezzin Mollâ Mustafa b. Mehmed, Mehmed Ağa b. Mustafa.