Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 215 Hüküm no: 164 Orijinal metin no: [42a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dergâh-ı âlî yeniçerilerinden vefât eden Mustafa Ağa’nın küçük oğlu Ali’ye babasının mirasından nafaka tayin edilmesi Havâss-ı Refîʻa kazâsı muzâfâtından Terkos nâhiyesine tâbi‘ Ormanlı karyesi ahâlîsinden Dergâh-ı âlî -dâme mahfûfen bi’l-maʻâlî- yeniçerilerinin ellinci bölük ortasında sâbıkā çorbacı mütekāʻidlerinden olup bundan akdem vefât eden Mustafa Ağa b. Hasan’ın sulbî sagīr oğlu Ali’nin tesviye-i umûruna bâ-hüccet-i şer‘iyye mansûbe vasiyyesi olan vâlidesi işbu râfiʻatü’l-kitâb Fâtıma Hatun bt. Abdullah meclis-i şer‘-i şerîf-i enverde takrîr-i kelâm ve tâʻbir ani’l-merâm edip vasiyyesi olduğum sagīr-i mezbûrun nafaka ve kisveye eşedd-i ihtiyâcı olmağla babası müteveffâ-i mezbûrdan müntakil mâl-ı mevrûsundan kadr-i ma‘rûf nafaka ve kisve-bahâ farz ve takdîr buyrulmak matlûbumdur dedikde vasiyye-i mezbûrenin kelimât-ı meşrûhası vâkıʻa mutâbık idiği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olmağın hâkim-i muvakki‘-ı sadr-ı kitâb tûbâ-lehû ve hüsnü-meâb efendi hazretleri sagīr-i mezbûra babası müteveffâ-i mezbûrdan müntakil mâl-ı mevrûsundan beher yevm beş para nafaka ve kisve-bahâ farz ve takdîr buyurup meblağ-ı mefrûz-ı mezbûr sagīr-i mezbûrun nafaka ve kisvesine harc u sarfa ve lede’l-iktizâ istidâneye ve inde’z-zafer mâlından rücû‘a vasiyye-i mezbûre[ye] izin vermeğin mâ-vaka‘a bi’t-taleb ketb olundu. Fi’l-yevmi’l-hâdî aşer min-Zilkaʻde sene semân ve hamsîn ve mi’e ve elf. Şuhûdü’l-hâl: Ahmed Efendi el-İmâm der-karye-i Karaca, Mustafa Beşe b. Memiş, Müezzin Mollâ Mustafa b. Mehmed, Mehmed Ağa b. Mustafa.