Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 216 Hüküm no: 165 Orijinal metin no: [42b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Abdullah’ın vefât eden kocası Dergâh-ı âlî yeniçerilerinden Mustafa Ağa’nın mehir alacağını terekesinden almak istemesi Husûs-ı âti’l-beyânın mahallinde istimâ‘ ve tahrîri için savb-ı şer‘-i enverden Mevlânâ Ahmed Efendi b. Mustafa Efendi irsâl olunup ol dahi Havâss-ı Refîʻa kazâsı muzâfâtından Terkos nâhiyesine tâbi‘ Ormanlı karyesi ahâlîsinden Dergâh-ı âlî -dâme mahfûfen bi’l-maʻâlî- yeniçerilerinin ellinci bölük ortasında sâbıkā çorbacı mütekāʻidlerinden olup bundan akdem vefât eden Mustafa Ağa b. Hasan’ın karye-i mezbûrede vâki‘ hayâtında sâkin olduğu çiftlik tâʻbir olunur menzile varıp zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî ettikde müteveffâ-i mezbûrun zevce-i menkûha-i metrûkesi olup zâtı ta‘rîf-i şer‘î ile mu‘arrefe olan işbu râfiʻatü’l-kitâb Fâtıma bt. Abdullah nâm hatun meclis-i ma‘kūd-ı mezkûrda müteveffâ-i mezbûrun sulbî sagīr oğlu Ali’nin tesviye-i umûruna li-ecli’l-maslaha vasî nasb olunan Mustafa Ağa b. İbrahim mahzarında üzerine da‘vâ ve takrîr-i kelâm edip zevcim müteveffâ-i mezbûr Çorbacı Mustafa Ağa b. Hasan b. Abdullah zimmetinde mütekarrer ve ma‘kūdün-aleyh yüz guruş mehr-i müeccel hakkım olup hatta müteveffâ-i mezbûr hâl-i hayâtında ve kemâl-i akl [u] sıhhatinde meblağ-ı mezbûr ol kadar guruş zimmetinde bana mehr-i müeccel deyn olduğunu huzûr-ı Müslimîn’de kirâren ve mirâren ikrâr ve işhâd edip kable’l-edâ fevt olmağla terekesinden taleb ederim, suâl olunsun dedikde gıbbe’s-suâl ve’l-inkâr müddeiyye-i mezbûreden müddeʻâsını mübeyyine beyyine taleb olundukda udûl-ı ahrâr-ı ricâl-i Müslimîn’den karye-i mezbûre imâmı Mehmed Efendi b. Ali ve Ali Ağa b. Abdullah nâm kimesneler li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka işbu müdde‘iye-i mezbûre Fâtıma Hatun’un zevci müteveffâ-i mezbûr Çorbacı Mustafa Ağa b. Hasan b. Abdullah zimmetinde mütekarrer ve ma‘kūdün-aleyh yüz guruş mehr-i müeccel hakkı olup hatta müteveffâ-i mezbûr hâl-i hayâtında ve kemâl-i akl [u] sıhhatinde meblağ-ı mezbûr ol kadar guruş zevcesi müdde‘iye-i mezbûre Fâtıma Hatun’a zimmetinde mehr-i müeccel deyni olduğunu bizim huzûrumuzda kirâren ve mirâren ikrâr ve bizi işhâd eyledi, biz bu husûsa bu vech üzere şâhidleriz, şehâdet dahi ederiz deyü herbiri edâ-yı şehâdet-i şer‘iyye eylediklerinde ba‘de’t-taʻdîl ve’t-tezkiye şehâdetleri makbûle olmağın gıbbe’t-tahlîfü’ş-şer‘î mûcebiyle baʻde’l-hükm vâki‘ hâli mevlânâ-yı mezbûr mahallinde ketb u tahrîr, ba‘dehû ma‘an baʻs olunan Çukadâr Yusuf Bey b. Abdullah ve Muhzır es-Seyyid Mehmed b. es-Seyyid Mustafa ile meclis-i şer‘a gelip herbiri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’l-hâdî aşer min-Zilkaʻde sene semân ve hamsîn ve mi’e ve elf. Şuhûdü’l-hâl: Ahmed Efendi el-İmâm der-karye-i Karaca, Mehmed Beşe Muhzır, Mustafa b. Memiş, Müezzin Mollâ Mustafa b. Mehmed, Mehmed Ağa b. Mustafa, Hasan Ağa b. Mustafa.