Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 217 Hüküm no: 166 Orijinal metin no: [42b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Molla Hasan ve Molla Hüseyin’in ortak oldukları evlerini istağlal yoluyla el-Hâc Ali’nin küçük oğlu Mehmed’e satmaları Husûs-ı âti’l-beyânın mahallinde ketb u tahrîri için savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Topkapısı hâricinde vâki‘ el-Hâc Ebûbekir Ağa’nın sâkin olduğu menzile varıp zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî ettikde Havâss-ı Refîʻa kazâsı muzâfâtından Çekmece nâhiyesine tâbi‘ Tarakatya nâm karye sâkinlerinden Mollâ Hasan ve Mollâ Hüseyin ibney Mustafa nâm kimesneler meclis-i ma‘kūd-ı mezkûrda bundan akdem vefât eden el-Hâc Ali’nin sulbî sagīr oğlu Mehmed’in bâ-hüccet-i şer‘iyye vasiyy-i muhtârı olan işbu râfiʻü’l-kitâb Mollâ Mehmed b. Abdülmennan nâm kimesne mahzarında herbiri ikrâr-ı tâm ve takrîr-i kelâm edip yedimizde ale’l-iştirâki’s-seviyy mülkümüz olup karye-i mezbûrede vâki‘ lede’l-ahâlî ve’l-cîrân ma‘lûmü’l-hudûd ve’l-müştemilât çiftlik tâʻbir olunur mülk menzilimizi bin yüz elli altı senesi Recebi’l-müreccebʼin altıncı günü vasiyy-i merkūm Mollâ Mehmed’e iki yüz kırk guruşa bi-tarîkı’l-istiğlâl beyʻ ve teslîm, ol dahi ber-vech-i muharrer sagīr-i mezbûrun mâlıyla bi’l-vesâye iştirâ ve kabûl edip ve meblağ-ı mezbûr iki yüz kırk guruşu vasiyy-i merkūm yedinden herbirimiz bi’t-tamam ahz u kabz eylediğimizden sonra çiftlik tâʻbir olunur menzil-i mahdûd-ı mezkûru ba‘de’t-tahliyyeti’ş-şer‘iyye ve’t-tekābuzi’l-merʻî zikr olunan Receb’in altıncı gününden bu sene tamamına değin otuz altı guruşa bize îcâr, biz dahi istîcâr ve kabûl eyledik dediklerinde gıbbe’t-tasdîk müteveffâ-i mezbûrun sulbî kebîr oğlu işbu hâzır bi’l-meclis İbrahim Ağa nâm kimesne meclis-i [43a] mezkûrda vasiyy-i merkūm Mollâ Mehmed mahzarında ikrâr-ı tâm ve takrîr-i kelâm edip asl-ı mâl-ı mezkûr iki yüz kırk guruş ile icâreden müctemiʻ otuz altı guruş ki min-haysü’l-mecmû‘ iki yüz yetmiş altı guruşun edâsına bi’l-emr ve’l-kabûl kefâlet-i sahîha-i şer‘iyye ile ben dahi kefîl ve zâmin oldum dedikde gıbbe’t-tasdîki’ş-şer‘î vâki‘ hâli mevlânâ-yı mezbûr mahallinde ketb u tahrîr, ba‘dehû ma‘an baʻs olunan ümenâ-i şer‘le meclis-i şer‘a gelip herbiri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’l-hâmis min-Şaʻbâni’l-muʻazzam sene semân ve hamsîn ve mi’e ve elf. Şuhûdü’l-hâl: Ali Ağa b. el-Hâc Mehmed, Ebûbekir Ağa [b.] el-Hâc Osman, Mehmed Ağa b. İbrahim, el-Hâc Ebûbekir Ağa b. Halil, el-Hâc İbrahim Ağa b. Mustafa b. Ali.