Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 218 Hüküm no: 167 Orijinal metin no: [43a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice Hatun’un vârislerinin kendilerine intikal eden evi paylaşarak hisselerini almaları ve birbirlerinin zimmetlerini ibra etmeleri Husûs-ı âti’l-beyânın mahallinde zikri âtî menzili keşf ve mesâha için taraf-ı şer‘den irsâl olunan Mevlânâ Mustafa Efendi b. Hüseyin ile ol dahi Hâssa mi‘mâr halîfelerinden Mehmed Halîfe ve es-Seyyid Feyzullah Halîfe bâ-fermân-ı âlî ta‘yîn buyrulan Mübâşir İbrahim Çavuş ile medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Câmi‘-i Kebîr Mahallesiʼnde sâkine iken bundan akdem vefât eden Hadice Hatun bt. Abdullah’ın hayâtında sâkine olduğu menzile varıp zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî ettikde müteveffât-ı mezbûrenin verâseti sulbî kebîr oğulları Ali ve Halil ile sulbiye kebîre kızı Sâliha Hatun’a münhasıra olup kable’l-kısme mezbûr Halil dahi vefât edip verâseti zevce-i menkûha-i metrûkesi Safiye Hatun bt. Abdullah ile karındaşları mezbûrân Ali ve Sâliha Hatun’a münhasıra olduğu şer‘an zâhir ve müteʻayyen oldukdan sonra zâtı ta‘rîf-i şer‘î ile mu‘arrefe olan mezbûre Safiye Hatun meclis-i ma‘kūd-ı mezkûrda işbu râfiʻatü’l-kitâb kendi tarafından asâleten ve mezbûr Ali tarafından husûs-ı âti’l-beyânda vekîl-i sâbitü’l-vekâlesi olan mezbûre Sâliha Hatun mahzarında bi’l-verâse ikrâr-ı tâm ve takrîr-i kelâm edip müteveffât-ı evvel-i mezbûre Hadice Hatun’un ile’l-vefât yedinde mülkü ve hakkı idiği müsbet olup mahalle-i mezbûrede vâki‘ bir tarafdan mezbûre Sâliha Hatun’un âhar mülkü ve bir tarafdan Leblebici Mustafa tasarrufunda olan vakıf menzil ve bir tarafdan vakıf bağçe ve bir tarafdan tarîk-i hâs ile mahdûd iki bâb fevkānî oda ve dehlîz ve tahtında bir sagīr oda ve bir sofa ve tahtında bir matbah ve bir su kuyusu ve havluyu muhtevî mülk menzilden herbirimizin hissesi keşf ve mesâha olunup benim hissem için ta‘yîn ve tahsîs ve alâmet-i fâsıla vaz‘ olunan bir sofa ve dehlîz ve tahtında bir sagīr oda ve sâlifü’z-zikr iki bâb fevkānî oda ve tahtında bir matbah ve kenîf ve bir su kuyusu ve havlu mezbûrân Ali ve Sâliha Hatun’un hisseleri için ta‘yîn ve tahsîs ve alâmet-i fâsıla vaz‘ olunup bi’t-terâzî taksîm olunduğu vech-i muharrer üzere herbirimiz menzil-i mahdûd-ı mezkûrda olan hissemizi ahz u kaz eyledik, baʻde’l-yevm menzil-i mahdûd-ı mezkûra müte‘allika âmme-i da‘vâdan herbirimiz âharın zimmetlerini ibrâ ve ıskāt edip vechen mine’l-vücûh ve sebeben mine’l-esbâb menzil-i mahdûd-ı mezkûra müte‘allika katʻâ da‘vâ ve nizâ‘ımız yokdur dediklerinde gıbbe’t-tasdîki’ş-şer‘î vâki‘ hâli mevlânâ-yı mezbûr mahallinde ketb u tahrîr, ba‘dehû ma‘an ba‘s olunan Çukadâr Ahmed Ağa ve Muhzır es-Seyyid Mehmed ile mi‘mârân-ı mezbûrân meclis-i şer‘a gelip herbiri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâlis aşer min-Şevvâli’l-mükerrem sene semân ve hamsîn ve mi’e ve elf. Şuhûdü’l-hâl: Ebûbekir Efendi b. Mehmed, Abdülfettâh Efendi b. Mustafa, İsmail Efendi b. el-Hâc Osman, es-Seyyid Mehmed b. Mustafa, es-Seyyid Ahmed b. es-Seyyid Mehmed.