Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 221 Hüküm no: 169 Orijinal metin no: [43b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rukiye Hatun’un vârislerinden olan el-Hâc Mustafa’nın miras hisselerini alması Medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Selâhi Mehmed Bey Mahallesiʼnde sâkine iken bundan akdem vefât eden Rukiye Hatun bt. Za‘îm Mehmed Ağa’nın veresesinden li-ebeveyn ammioğlu el-Hâc Mustafa b. Ali meclis-i şer‘-i şerîf-i enverde müteveffât-ı mezbûrenin kendüden sonra vefât eden Hadice Hatun bt. Abdullah’ın zevci ve terekelerine vaz‘-ı yedi mütehakkık olan işbu râfiʻü’l-kitâb el-Hâc Osman b. Ahmed mahzarında bi’l-verâse ikrâr-ı tâm ve takrîr-i kelâm edip müteveffât-ı mezbûre Rukiye Hatun’un mecmû‘-ı terekesinden ber-mûceb-i defter-i kassâm-ı askerî bana isâbet [eden] hisse-i şer‘iyyemden bâkī menzil semeninden olmak üzere bâ-i‘lâm mahkûmun-bih edâsına tenbîh olunan on dört bin akçe hakkımdan an-musâlaha on bin sekiz yüz akçesini merkūm el-Hâc Osman bana def‘ ve teslîm, ben dahi ber-vech-i muharrer yedinden ahz u kabz edip bâkī üç bin iki yüz akçe mütâlebesinden ve zevcesi müteveffât-ı mezbûre Hadice Hatun’un sıhhatinde bi-tarîkı’l-emâne vaz‘ eylediği eşyâ-i memlûkemi ben kable’l-ahz fevt olmuşdur, taleb ederim deyü [da‘vâ] eylediği eşyâ-i ma‘lûmeye ve baʻde’l-yevm husûs-ı mîrâsa müte‘allika âmme-i da‘vâdan merkūm el-Hâc Osman’ın zimmetini ibrâ-i âmm-ı kātıʻu’n-nizâ‘la ibrâ ve ıskāt eylediğimde ol dahi bana medfû‘u olan meblağ-ı mezbûr [44a] on bin sekiz yüz akçe mütâlebesinden benim zimmetimi ibrâ ve ıskāt edip vechen mine’l-vücûh ve sebeben mine’l-esbâb birbirimiz ile da‘vâ ve nizâ‘ımız yokdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sâlis ve’l-ışrîn min-Zilkaʻdeti’ş-şerîfe sene semân ve hamsîn ve mi’e ve elf. Şuhûdü’l-hâl: el-Hâc Mehmed Ağa [b.] Ebûbekir, es-Seyyid Halil Çelebi [b.] el-Hâc Mustafa, es-Seyyid Ahmed [b.] es-Seyyid Mehmed, Ahmed Efendi b. Mustafa, Hüseyin Çelebi b. Mehmed.