Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 237 Hüküm no: 186 Orijinal metin no: [46b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Sipahi’nin Molla Ahmed b. Hüseyin’e borcunu ödemesi Fi’l-asl vilâyet-i Rumeli’nde Baharisne? kazâsına tâbi‘ Petniçka karyesi ahâlîsinden olup mahmiye-i İstanbul’da Hoca Paşa Mahallesi’nde müsâfiren sâkin Hasan Sipâhî b. Ali meclis-i şer‘-i şerîf-i enverde işbu râfiʻü’l-kitâb Mollâ Ahmed b. Hüseyin mahzarında ikrâr-ı tâm ve takrîr-i kelâm edip bundan akdem vefât eden karındaşım diğer Ahmed’in Paşa sancağında vâki‘ mutasarrıf olduğu tımarını bana tevcîh olunca her ne mikdâr akçe sarf olunursa makbûlümdür deyü bundan akdem merkūm Mollâ Ahmed’e emr edip ol dahi emrine binâen tımar-ı mezbûra ve sâire bin üç yüz guruş harc u sarf edip meblağ-ı mezbûr bin üç yüz guruşa merkūm Mollâ Ahmed’in yedine memhûr temessük i‘tâ ve ol vechile deynim olan meblağ-ı mezbûr bin altmış guruşunu an-nakdin merkūm Mollâ Ahmed’e def‘ ve teslîm, ol dahi yedinden baʻde’l-ahz ve’l-kabz bâkī kalan iki yüz kırk guruşunu hâlâ bâ-berât-ı âlîşân mutasarrıf olduğum Kubaç kalemi? ve sâir kurâlarımı bin yüz elli dokuz senesinde vâki‘ Mart ibtidâsından Şubat’ı gāyetine gelince deynim olan meblağ-ı bâkī-i mezbûr iki yüz kırk guruşa merkūm Mollâ Ahmed’e iltizâm eylediğimde ol dahi vech-i muharrer üzere iltizâmı baʻde’l-kabûl ve bedel-i iltizâm olan meblağ-ı mezbûr iki yüz kırk guruş deynime takās ol dahi mukāssa ve kabûl edip medfû‘um olan meblağ-ı mezbûr bin üç yüz guruşun harc u sarfına müte‘allika âmme-i da‘vâdan merkūm Mollâ Ahmed’in zimmetini ibrâ-i âmm-ı kātıʻu’n-nizâ‘la ibrâ ve ıskāt edip vechin mine’l-vücûh ve sebeben mine’l-esbâb husûs-ı mezbûra müte‘allik katʻâ da‘vâ ve nizâ‘ım yokdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’r-râbiʻ aşer min-Zilhicceti’ş-şerîfe li-sene semân ve hamsîn ve mi’e ve elf. [47a] Şuhûdü’l-hâl: İbrahim Halîfe, Bosnevî Hüseyin Ağa sâkin-i Manastır, Salih Beşe b. Ali Beşe, Mustafa Beşe b. İbrahim.