Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 237 Hüküm no: 187 Orijinal metin no: [47a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kalaycı Ali Çelebi’nin vârislerinden olan kardeşi Ahmed Beşe’ye ait terekedeki hissenin vekili Mehmed Çelebi ‘ye verilmesi Husûs-ı âti’l-beyânın mahallinde istimâ‘ ve tahrîri için savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Davud Ağa Mahallesiʼnde sâkin iken bundan akdem vefât eden Kalaycı Ali Çelebi b. Mustafa’nın hayâtında sâkin olduğu menzile varıp zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî ettikde müteveffâ-i mezbûrun verâseti zevce-i menkûha-i metrûkesi Râbia Hatun bt. Ahmed ile Mısr-ı Kahire’de sâkin li-ebeveyn er karındaşı Ahmed Beşe’ye münhasıra ve tashîh-i meselesi dört sehmden i‘tibâr olunup sihâm-ı mezbûreden bir sehmi zevcesi mezbûre Râbia Hatun’a ve üç sehmi merkūm Ahmed Beşe’ye isâbeti tahakkukundan sonra merkūm Ahmed Beşe tarafından ber-vech-i âtî vekâlet iddiʻâ eden li-ebeveyn ammioğlu işbu râfiʻü’l-kitâb Mehmed Çelebi b. Abidin meclis-i ma‘kūd-ı mezkûrda müteveffâ-i mezbûrun terekesine bi’l-verâse vâzıʻatü’l-yed olan zevce-i mezbûre Râbia Hatun mahzarında üzerine da‘vâ ve takrîr-i kelâm edip müvekkil-i merkūm Ahmed Beşe b. Mustafa Mısr-ı Kahire’ye gider olduğu hâlde hukūk-ı şer‘îye müte‘allik cemî‘ umûrunu “küllemâ azeltüke fe-ente vekîl” mazmûnu üzere tarafından vekâlet-i mutlak ile huzûr-ı Müslimîn’de beni vekîl ve nâib-i menâb nasb u ta‘yîn eylediğinde ben dahi vekâlet-i mezbûreyi muvâcehesinde baʻde’l-kabûl ber-mûceb-i defter-i kassâm tashîh-i merkūm üzere üç sehm hissesini müteveffâ-i mezbûrun terekesinden bi’l-vekâle taleb ederim, suâl olunsun dedikde gıbbe’s-suâl mezbûre Râbia Hatun cevâbında Mısr-ı Kahire’de sâkin müvekkil-i mezbûr Ahmed Beşe müteveffâ-i mezbûr Ali Çelebi’nin li-ebeveyn er karındaşı olduğunu ikrâr lâkin müdde‘î-i mezbûrun ber-vech-i muharrer vekîl olduğunu inkâr edicek, müdde‘î-i mezbûrdan müddeʻâsını mübeyyine beyyine taleb olundukda udûl-ı ahrâr-ı ricâl-i Müslimîn’den mahmiye-i İstanbul’da Nişancı Mahallesiʼnde sâkin es-Seyyid Mehmed b. es-Seyyid Salih ve es-Seyyid Mustafa b. es-Seyyid Mehmed nâm kimesneler li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka müteveffâ-i mezbûr Kalaycı Ali Çelebi b. Mustafa b. Abdullah’ın Mısr-ı Kahire’de sâkin müvekkil-i merkūm Ahmed Beşe li-ebeveyn er karındaşı olup Mısr-ı Kahire’ye gider olduğu hâlde hukūk-ı şer‘îye müte‘allik umûrunu rü’yete “küllemâ azeltüke fe-ente vekîl” mazmûnu üzere tarafından vekâlet-i mutlak ile işbu müdde‘î-i mezbûr Mehmed Çelebi’yi bizim huzûrumuzda vekîl ve nâib-i menâb nasb u ta‘yîn eylediğinde ol dahi vekâlet-i mezbûreyi muvâcehesinde kabûl eyledi, biz bu husûsa bu vech üzere şâhidleriz, şehâdet dahi ederiz deyü herbiri edâ-yı şehâdet-i şer‘iyye eylediklerinde ba‘de’t-taʻdîl ve’t-tezkiye şehâdetleri makbûle olmağın mûcebiyle müvekkil-i merkūm Ahmed Beşe’nin ber-mûceb-i defter-i kassâm hisse-i irsiyyesini vekîl müdde‘î-i mezbûr Mehmed Çelebi’ye edâ ve teslîme Râbia Hatun’a tenbîh-birle vâki‘ hâli mevlânâ-yı mezbûr mahallinde ketb u tahrîr, ba‘dehû ma‘an ba‘s olunan Ahmed Ağa ve Muhzır es-Seyyid Mehmed ile meclis-i şer‘a gelip herbiri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâbiʻ min-Zilhicceti’ş-şerîfe li-sene semân ve hamsîn ve mi’e ve elf. Şuhûdü’l-hâl: Ebûbekir Ağa [b.] Abdullah, Mehmed Çelebi b. Mehmed, Lütfullah b. es-Seyyid Mehmed, es-Seyyid Ahmed b. Seyyid İbrahim, Halil Çelebi, Ahmed Efendi b. ( ).