Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 239 Hüküm no: 188 Orijinal metin no: [47a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Ağa’nın Manastır kazasındaki ev ve tarlalarının yarısını borcuna karşılık olarak Bostancı Molla Ahmed’e vermesi Fi’l-asl vilâyet-i Rumeli’nde Manastır kazâsına tâbi‘ Yordiz karyesi ahâlîsinden olup mahmiye-i İstanbul’da Karagümrük’de müsâfiren sâkin Hasan Ağa b. Ahmed nâm kimesne meclis-i şer‘-i şerîf-i enverde işbu râfiʻü’l-kitâb Bostanî Mollâ Ahmed b. Hüseyin mahzarında ikrâr-ı tâm ve takrîr-i kelâm edip merkūm Bostanî Ahmed’e cihet-i karz-ı şer‘îden bâ-temessük dört yüz seksen guruş bir zolota zimmetimde edâsı lâzım deynim olmağla meblağ-ı mezbûr mukābelesinde karye-i mezbûrede vâki‘ bir tarafdan Mustafa Beşe menzili ve bir tarafdan çiftçiler taşı ve bir tarafdan dere ve bir tarafdan tarîk-i âm ile mahdûd çiftlik tâʻbir olunur iki bâb oda ve anbar ve kenîf ve havluyu muhtevî mülk menzilimin nısfını üç yüz guruşa beyʻ ve temlîk ve karye-i mezbûre hudûdu dâhilinde vâki‘ lede’l-ahâlî ve’l-cîrân ma‘lûmü’l-hudûd ve’l-kıt‘a tarlalarımın ve çayırlarımın dahi nısfını yüz seksen guruş bir zolotaya bâ-ma‘rifet-i sâhib-i arz merkūm Mollâ Ahmed’e ferağ ve tefvîz ve mahallinde zabt u tasarrufa taslît eylediğimde ol dahi ber-vech-i muharrer iştirâ ve temellük ve tasallut ve tefevvüz ve kabûl edip semen-i emlâk-i mebîʻ-i mezbûr üç yüz guruş ile bedel-i ferağ yüz seksen guruş bir zolota min-haysü’l-mecmû‘ dört yüz seksen guruş bir zolotayı deynim olan meblağ-ı mezbûra takās eylediğimde ol dahi mukāssa ve kabûl edip baʻde’l-yevm çiftlik tâʻbir olunur menzil-i mahdûd-ı mezkûrun nısfı merkūm Mollâ Ahmed’in müşterâsı olup mârru’z-zikr tarlalarımın nısfı dahi merkūm Mollâ Ahmed’in hakk-ı makbûzu olmuşdur, keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’r-râbiʻ aşer min-Zilhicceti’ş-şerîfe sene semân ve hamsîn ve mi’e ve elf. Şuhûdü’l-hâl: İbrahim Ağa tâbi‘-i (…) karye-i (…), Bosnevî Hüseyin Ağa sâkin-i Manastır, Salih Beşe b. Ali Beşe, Mustafa b. İbrahim, Mollâ Ebûbekir b. Hüseyin, Osman Ağa b. ( ) tâbiʻ-i halîfe-i cizyedâr, diğer Salih beşe b. Hüseyin, el-Hâc İsmail b. el-Hâc Ahmed, es-Seyyid Mehmed b. es-Seyyid Mustafa.