Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 239 Hüküm no: 189 Orijinal metin no: [47b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fethi Hatun’un vefât eden kızı Rukiye’nin terekesinden kendine düşen hisse ile alacağını damadı Osman Çelebi’den alarak zimmetini ibra etmesi Husûs-ı âti’l-beyânın mahallinde ketb u tahrîri için savb-ı şer‘-i enverden Mevlânâ Ahmed Efendi b. Mustafa Efendi irsâl olunup ol dahi medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Takyecibaşı Mahallesiʼnde sâkine Fethi Hatun bt. Abdullah’ın sâkine olduğu menzile varıp zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî ettikde fahrü’l-kuzât Süleyman Efendi b. Süleyman ve Mustafa b. Mahmud ta‘rîfleriyle mu‘arrefe olan mezbûre Fethi Hatun meclis-i ma‘kūd-ı mezkûrda dâmâdı işbu râfiʻü’l-kitâb Osman Çelebi b. Abdullah mahzarında ikrâr-ı tâm ve takrîr-i kelâm edip bundan akdem vefât eden kızım Rukiye Hatun bt. İvaz’ın merkūm Osman Çelebi zevci olup zimmetinde mütekarrer ve ma‘kūdün-aleyh altı bin akçe mehr-i müecceli ile terekesini beynlerimizde tevzî‘ ve taksîm ve herbirimiz hissemizi bi-kadri’l-hısas ahz u kabz eylediğimizden sonra kendi mâlımdan olmak üzere cihet-i karz-ı şer‘îden dâmâdım merkūm Osman Çelebi’ye yüz doksan guruş idâne ve teslîm, ol dahi vech-i muharrer yedimden istidâne ve kabz edip meblağ-ı mezbûru târîh-i kitâbdan altı ay mukaddem dâmâdım merkūm Osman Çelebi bana def‘ ve teslîm, ben dahi yedinden bi’t-tamam ve’l-kemâl ahz u kabz eyledim, baʻde’l-yevm kızım müteveffât-ı mezbûrenin terekesine ve meblağ-ı mezbûr yüz doksan guruşa müte‘allika âmme-i da‘vâdan dâmâdım merkūm Osman Çelebi’nin zimmetini ibrâ-i âmm-ı kātıʻu’n-nizâ‘la ibrâ ve ıskāt edip vechen mine’l-vücûh ve sebeben mine’l-esbâb katʻâ da‘vâ ve nizâ‘ım yokdur dedikde gıbbe’t-tasdîki’ş-şer‘î vâki‘ hâli mevlânâ-yı mezbûr mahallinde ketb u tahrîr, ba‘dehû ma‘an ba‘s olunan ümenâ-i şer‘den Çukadâr Ahmed Ağa ve Muhzır es-Seyyid Mehmed ile meclis-i şer‘a gelip herbiri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’l-hâdî ve’l-ışrîn min-Zilhicceti’ş-şerîfe sene semân ve hamsîn ve mi’e ve elf. Şuhûdü’l-hâl: Fahrü’l-kuzât Süleyman Efendi b. Süleyman, Mustafa Beşe b. Mahmud, Ali Çelebi b. Abdullah, diğer Ali Çelebi b. Abdullah, Osman Çelebi b. Ali, Yusuf Çelebi b. Abdullah, es-Seyyid Mehmed Çelebi [b.] es-Seyyid Mustafa, es-Seyyid Ahmed [b.] es-Seyyid Mehmed, Hüseyin Çelebi b. Mehmed.