Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 246 Hüküm no: 195 Orijinal metin no: [49a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Çelebi b. Mehmed’in vârislerinin babalarından miras kalan evdeki hisselerini annelerine satmaları Medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Fethi Çelebi Mahallesiʼnde sâkin iken bundan akdem vefât eden Hasan Çelebi b. Mehmed’in verâseti zevce-i menkûha-i metrûkesi Sâliha Hatun bt. Mehmed ile sulbî kebîr oğulları Hüseyin Çelebi ve Yusuf Çelebi nâm kimesnelere ve sulbiye kebîre kızları Hadice ve Rukiye ve Fâtıma nâm hatunlara ve tashîh-i meseleleri elli altı sehmden i‘tibâr olunup sihâm-ı mezbûreden yedi sehmi zevcesi mezbûre Sâliha Hatun’a ve on dörder sehmi oğulları mezbûrândan herbirine ve yedişer sehmi kızları mezbûretândan herbirine isâbeti tahakkukundan sonra kendi tarafından asîl ve kız karındaşları mezbûrât Hadice ve Rukiye ve Fâtıma nâm hatunların taraflarından husûs-ı âti’l-beyânda beyʻa vekîl olduğunu zâtlarını bi’l-ma‘rifeti’ş-şer‘iyye ârifân Hasan b. İbrahim ve Süleyman b. Hasan nâm kimesneler şehâdetleriyle vekâleti sâbit olan mezbûr Yusuf Çelebi meclis-i şer‘-i şerîf-i enverde vâlidesi işbu râfiʻatü’l-kitâb mezbûre Sâliha Hatun mahzarında bi’l-verâse ve’l-vekâle ikrâr-ı tâm ve takrîr-i kelâm edip mahalle-i mezbûrede vâki‘ bir tarafdan Ahmed Beşe menzili ve bir tarafdan Çanak İbrahim menzili ve bir tarafdan Şişeci Ahmed menzili ve bir tarafdan tarîk-i âm ile mahdûd iki bâb fevkānî oda ve kenîf ve tahtında ahırı muhtevî mülk menzilin nısfı babam müteveffâ-i mezbûrun ile’l-vefât yedinde mülk ve hakkı olmağla ber-vech-i muharrer tashîh-i merkūm üzere bana isâbet eden on dört sehm hisse-i irsiyyemi vâlidem mezbûre Sâliha Hatun’a bin sekiz yüz akçeye bi’l-asâle beyʻ ve temlîk ve teslîm, ol dahi iştirâ ve temellük ve tesellüm ve kabûl edip semeni olan meblağ-ı mezbûr mütâlebesinden vâlidem mezbûre Sâliha Hatun’un zimmetini ibrâ ve ıskāt eylediğimden sonra nısf menzil-i mezkûrdan kız karındaşlarım müvekkilât-ı mezbûrâta babaları müteveffâ-i mezbûrdan isâbet eden yirmi bir sehm hisse-i irsiyyelerini dahi vâlidem mezbûre Sâliha Hatun’a iki bin yedi yüz akçeye bi’l-vekâle beyʻ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl edip semeni olan meblağ-ı mezbûr iki bin yedi yüz akçeyi vâlidem mezbûre Sâliha Hatun yedinden bi’l-vekâle ahz u kabz eyledim, baʻde’l-yevm nısf menzil-i mezkûrda olan benim on dört sehm hisse-i irsiyyem ile kız karındaşlarım müvekkilât-ı mezbûrât [49b] Hadice ve Rukiye ve Fâtıma nâm hatunların tashîh-i merkūm üzere yirmi bir sehm hisse-i irsiyyelerine katʻâ alâka ve medhalleri kalmayıp vâlidem mezbûre Sâliha Hatun’un mülk-i müşterâsı ve hakk-ı sırfı olmuşdur, keyfe mâ teşâ ve tahtâr mutasarrıfe olsun dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis ve’l-ışrîn min-Zilhicceti’ş-şerîfe sene semân ve hamsîn ve mi’e ve elf. Şuhûdü’l-hâl: Fahrü’l-kuzât Mehmed Efendi b. Abdullah, es-Seyyid Hüseyin Efendi b. Mustafa, Mollâ Ali b. Mustafa, Halil Efendi b. Ahmed.