Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 247 Hüküm no: 196 Orijinal metin no: [49b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Çelebi’nin vârislerinden oğlu Hüseyin Çelebi’nin, evdeki yarı hissesi ile mirastan kendine düşen hissesini annesine satması Medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Fethi Çelebi Mahallesiʼnde sâkin iken bundan akdem vefât eden Hasan Çelebi b. Mehmed’in verâseti zevce-i menkûha-i metrûkesi Sâliha Hatun bt. Mehmed ile sulbî kebîr oğulları Hüseyin Çelebi ve Yusuf Çelebi’ye ve sulbiye kebîre kızları Hadice ve Rukiye ve Fâtıma nâm hatunlara münhasıra ve tashîh-i meseleleri elli altı sehmden i‘tibâr olunup sihâm-ı mezbûreden yedi sehmi zevcesi mezbûre Sâliha Hatun’a ve on dörder sehmi oğulları mezbûrân Hüseyin Çelebi ve Yusuf Çelebi’den herbirine ve yedişer sehmi kızları mezbûretândan herbirine isâbeti tahakkukundan sonra mezbûr Hüseyin Çelebi meclis-i şer‘-i şerîf-i enverde vâlidesi işbu râfiʻatü’l-kitâb mezbûre Sâliha Hatun mahzarında bi’l-asâle ikrâr-ı tâm ve takrîr-i kelâm edip mahalle-i mezbûrede vâki‘ bir tarafdan Ahmed Beşe menzili ve bir tarafdan Çanak İbrahim menzili ve bir tarafdan Şişeci Ahmed menzili ve bir tarafdan tarîk-i âm ile mahdûd iki bâb fevkānî oda ve kenîf ve tahtında ahırı muhtevî mülk menzilin nısfı babam müteveffâ-i mezbûrun ile’l-vefât yedinde mülkü olup ve nısf-ı âhar dahi benim mülküm olmağla nısf menzil-i mezkûru cemî‘ tevâbiʻ ve levâhıkıyla tarafeynden îcâb ve kabûlü hâvî ve şürût-ı müfsideden ârî bey‘-i bâtt-ı sahîh-i şer‘î ile vâlidem mezbûre Sâliha Hatun’a altmış guruşa beyʻ ve temlîk ve teslîm, ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezbûr altmış guruşu vâlidem mezbûre Sâliha Hatun yedinden bi’t-tamam ahz u kabz eylediğimden sonra sâlifü’z-zikr babam müteveffâ-i mezbûrdan müntakil nısf menzil-i mezkûrdan tashîh-i merkūm üzere bana isâbet eden on dört sehm hisse-i irsiyyemi dahi vâlidem mezbûre Sâliha Hatun’a on beş guruşa beyʻ ve temlîk ve teslîm, ol dahi iştirâ ve temellük ve tesellüm ve kabûl ve kabz ve kabûl eylediğinden sonra semeni olan meblağ-ı mezbûr on beş guruş mütâlebesinden vâlidem mezbûre Sâliha Hatun’un zimmetini ibrâ-i âmm-ı kātıʻu’n-nizâ‘la ibrâ ve ıskāt eyledim, baʻde’l-yevm nısf menzil-i mahdûd-ı mezkûr ile sâlifü’z-zikr on dört sehm hisse-i irsiyyemde benim katʻâ alâka ve medhalim kalmayıp vâlidem mezbûre Sâliha Hatun’un mülk-i müşterâsı ve hakk-ı sırfı olmuşdur, keyfe mâ teşâ ve tahtâr mutasarrıfe olsun dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis ve’l-ışrîn min-Zilhicceti’ş-şerîfe sene semân ve hamsîn ve mi’e ve elf. Şuhûdü’l-hâl: Eş-Şâhidûnü’s-sâbıkūn.