Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 249 Hüküm no: 198 Orijinal metin no: [50a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Ağa’nın, vefât eden Mustafa Ağa’nın küçük oğlu Ali için vasisine borç vermiş olduğu Havâss-ı Refîʻa kazâsı muzâfâtından Terkos nâhiyesine tâbi‘ Ormanlı karyesinde sâkin Ahmed Ağa b. Mustafa meclis-i şer‘-i şerîf-i enverde Dergâh-ı âlî -dâme mahfûfen bi’l-maʻâlî- yeniçerilerinin ellinci bölük odasının sâbıkā çorbacı mütekāʻid[lerin]den olup karye-i mezbûre ahâlîsinden iken bundan akdem vefât eden Mustafa Ağa b. Hasan’ın sulbî sagīr oğlu Ali’nin vâlidesi ve tesviye-i umûruna bâ-hüccet-i şer‘iyye mansûb vasiyyesi olan işbu râfiʻatü’l-kitâb Fâtıma Hatun bt. Abdullah tarafından husûs-ı âti’l-beyânda tasdîka vekîl-i sâbitü’l-vekâlesi olan sagīr-i mezbûrun ammizâdesi Mustafa Ağa b. İbrahim mahzarında ikrâr-ı tâm ve takrîr-i kelâm edip vasiyye müvekkile-i mezbûre Fâtıma Hatun sagīr-i mezbûrun mâlından bâ-temessük bi’l-vesâye bana altı yüz guruş idâne ve teslîm, ben dahi ber-vech-i muharrer meblağ-ı mezbûru yedinden istidâne ve ahz u kabz eyledim, meblağ-ı mezbûr vasiyye-i mezbûre zimmetinde vâcibü’l-edâ deynimdir deyü ikrâr u i‘tirâf etmeğin mâ-vaka‘a bi’t-taleb ketb olundu. Fi’l-yevmi’s-sâmin min-Zilhicceti’ş-şerîfe sene semân ve hamsîn ve mi’e ve elf. Şuhûdü’l-hâl: Mustafa Efendi b. Hüseyin, Ahmed Efendi b. Mustafa, es-Seyyid Ahmed [b.] es-Seyyid Mehmed, es-Seyyid Mehmed [b.] es-Seyyid Mustafa, İmâm Mehmed Efendi b. Ali, Mustafa Beşe b. Memiş.