Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 250 Hüküm no: 199 Orijinal metin no: [50a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Liko ve Kino adlı zimmîlerin Kara Hasanoğlu bahçesinde kiracı iken ölen Nilo v. Kino’nun çocukları ve vârisi olduklarını ispatlamaları Havâss-ı Refîʻa kazâsından Yenikapı Mevlevîhâne kapısı hâricinde vâki‘ Kara Hasanoğlu bağçesi demekle ma‘rûf bağçede müstecir iken bundan akdem hâlik olan Nilo v. Kino nâm zimmînin sulbî kebîr oğulları ve ber-vech-i âtî vâris olduklarını iddiʻâ eden işbu râfiʻayü’s-sifr Liko ve Kino nâm zimmîler meclis-i şer‘-i şerîf-i enverde Hâslar beytülmâlı emîni olup hâlik-i mezbûrun terekesine bi’l-emâne vaz‘-ı yed eden fahrü’l-akrân İbrahim Ağa b. Halil mahzarında herbiri bi’l-verâse üzerine da‘vâ ve takrîr-i kelâm edip hâlik-i mezbûr Nilo v. Kino v. Yorgo nâm zimmî bizim babamız olup hatta müteveffâ-i mezbûr hâl-i hayâtında ve kemâl-i akl [u] sıhhatinde bizim babamız olup sulbî kebîr oğulları olduğumuzu Nasârâ muvâcehesinde kirâren ve mirâren ikrâr ve işhâd edip ol vechile terekesine bizden gayrı müstahikk-ı âhar olmayıp emîn-i merkūm beytülmâl olmak zuʻmuyla bi-gayr-ı hakkın vaz‘-ı yed eder, suâl olunup kasr-ı yedine tenbîh olunmak matlûbumuzdur dediklerinde gıbbe’s-suâl emîn-i mezbûr cevâbında hâlik-i mezbûrun terekesine bi’l-emâne vaz‘-ı yedini ikrâr lâkin müdde‘iyân-ı mezbûrânın ber-vech-i muharrer müddeʻâsını inkâr edicek, müddeʻiyân-ı mezbûrândan müddeʻâlarını mübeyyine beyyine taleb olundukda udûl-ı ahrâr-ı Nasârâ’dan olup Havâss-ı mezbûrede Topkapısı hâricinde diğer Kara Hasanoğlu bağçesinde mütemekkin Bice v. Simo ve Bayrampaşa’da Yenibağçe demekle ma‘rûf bağçede mütemekkin Hıristuvan v. Simo nâm zimmîler li-ecli’ş-şehâde meclis-i şer‘a hâzırân olup isre’l-istişhâd fi’l-hakīka hâlik-i mezbûr Nilo v. Kino v. Yorgo nâm zimmî işbu müddeʻiyân-ı mezbûrânın babaları olup hatta hâlik-i mezbûr hâl-i hayâtında ve kemâl-i akl [u] sıhhatinde müddeʻiyân-ı mezbûrân Liko ve Kino nâm zimmîler sulbî oğulları olduğunu bizim muvâcehemizde kirâren ve mirâren ikrâr ve bizi işhâd edip ol vechile terekesine bunlardan gayrı müstahikk-ı âhar olduğu ma‘lûmumuz değildir, biz bu husûsa bu vech üzere şâhidleriz, şehâdet dahi ederiz deyü herbiri edâ-yı şehâdet-i şer‘iyye eylediklerinde ba‘de riʻâyeti şerâiti’l-kabûl şehâdetleri makbûle ve mûcebiyle baʻde’l-hükm mâ-vaka‘a bi’t-taleb ketb olundu. Fi’l-yevmi’l-hâmis min-Zilhicceti’ş-şerîfe sene semân ve hamsîn ve mi’e ve elf. Şuhûdü’l-hâl: Ahmed Kethüdâ b. Mehmed, Ali Beşe b. İbrahim, Ahmed Efendi b. Mustafa, Mustafa Efendi b. Hüseyin. Sarafi v. Nikola, Nikola v. Hıristo, Niçe v. Yorgi, Hıristo v. Aci Kostantin.