Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 251 Hüküm no: 200 Orijinal metin no: [50b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Abdullah’ın vefât eden Mustafa Çelebi’deki alacağını vârislerinden tahsil etmesi Mahmiye-i İstanbul’da Koska’da sâkin el-Hâc el-Hâc Abdullah b. Hüseyin nâm kimesne meclis-i şer‘-i şerîf-i enverde medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Musa Çavuş Mahallesiʼnde sâkin iken bundan akdem vefât eden Mustafa Çelebi b. Osman’ın terekesine bi’l-verâse vâzıʻâtü’l-yed olan râfiʻâtü’l-kitâb zevce-i menkûha-i metrûke Sâliha Hatun bt. İbrahim ile vâlidesi Havvâ Hatun bt. Ahmed’in tarafından husûs-ı âti’l-beyânda tasdîka vekîl-i sâbitü’l-vekâlesi olan İbrahim Çelebi b. Ahmed ve li-ümmin kız karındaşı Hafize Hatun’un zevci ve tarafından husûs-ı âti’l-beyânda tasdîka vekîl-i sâbitü’l-vekâlesi olan Hamza Efendi b. Hüseyin ve yine li-ümmin kız karındaşı Fâtıma Hatun’un zevci ve tarafından husûs-ı âti’l-beyânda tasdîka vekîl-i sâbitü’l-vekâlesi olan Abdülgafur Efendi b. Ali mahzarlarında ikrâr-ı tâm ve takrîr-i kelâm edip müteveffâ-i mezbûr Mustafa Çelebi b. Osman zimmetinde cihet-i karz-ı şer‘îden kırk beş guruş hakkım olup meblağ-ı mezbûrdan otuz guruşunu mezbûre Sâliha Hatun ile müvekkilât-ı mezbûrât Havvâ ve Hafize ve Fâtıma nâm hatunlar bana def‘ ve teslîm, ben dahi ber-vech-i muharrer meblağ-ı mezbûr otuz guruşu yedlerinden bi’t-tamam ahz u kabz edip bâkī on beş guruş mütâlebesinden mezbûre Sâliha Hatun ile müvekkilât-ı mezbûrâtın zimmetlerini ibrâ-i âmm-ı kātıʻu’n-nizâ‘la ibrâ ve ıskāt eyledim dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî ve’l-ışrîn min-Zilhicceti’ş-şerîfe li-sene semân ve hamsîn ve mi’e ve elf. Şuhûdü’l-hâl: İbrahim Ağa b. el-Hâc Abdurrahman, Ahmed Efendi b. Mustafa Efendi, es-Seyyid Mehmed [b.] es-Seyyid Mustafa, es-Seyyid Ahmed b. es-Seyyid Mehmed, Halil Çelebi b. İbrahim, Halil Efendi el-Mukayyid.