Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 251 Hüküm no: 201 Orijinal metin no: [50b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sâliha Hatun’un, vefât eden kocası Mustafa Çelebi’nin terekesinden mehir ile miras hissesini alarak diğer vârislerin zimmetlerini ibra etmesi Medîne-i Hazret-i Ebî Eyyüb el-Ensârî -aleyhi rıdvânü’l-bârî-’de Musa Çavuş Mahallesiʼnde sâkin iken bundan akdem vefât eden Mustafa Çelebi b. Osman’ın verâseti zevce-i menkûha-i metrûkesi Sâliha Hatun bt. İbrahim ile vâlidesi Havvâ Hatun bt. Ahmed’e ve li-ümmin kız karındaşları Hafize ve Fâtıma bintey İbrahim nâm hatunlara münhasıra olduğu şer‘an zâhir ve müteʻayyen oldukdan sonra zâtı ta‘rîf-i şer‘î ile mu‘arrefe olan zevce-i mezbûre Sâliha Hatun meclis-i şer‘-i şerîf-i enverde müteveffâ-i mezbûrun terekesine bi’l-verâse vâzıʻâtü’l-yed olan işbu râfiʻât[ü’l-kitâb] mezbûre Havvâ Hatun tarafından husûs-ı âti’l-beyânda tasdîka vekîl-i sâbitü’l-vekâlesi olan İbrahim Çelebi b. Ahmed ve kezâlik mezbûre hatunun zevci ve tarafından husûs-ı âti’l-beyânda tasdîka vekîl-i sâbitü’l-vekâlesi olan Hamza Efendi b. Hüseyin yine mezbûre Fâtıma Hatun’un zevci ve tarafından husûs-ı âti’l-beyânda kezâlik tasdîka vekîl-i sâbitü’l-vekâlesi olan Abdülgafur Efendi b. Ali mahzarında bi’l-verâse ikrâr-ı tâm ve takrîr-i kelâm edip işbu yedimde olan mahkûmun-bih hüccet-i şer‘iyye mûcebince zevcim müteveffâ-i mezbûr zimmetinde mütekarrer ve ma‘kūdün-aleyh elli guruş mehr-i müeccel hakkım ile zevcim müteveffâ-i mezbûrun terekesinden hisse-i irsiyyem için otuz üç guruş ki min-haysü’l-mecmû‘ seksen üç guruşu müvekkilât-ı mezbûrât Havvâ ve Hafize ve Fâtıma nâm hatunlar bana def‘ ve teslîm, ben dahi ber-vech-i muharrer meblağ-ı mezbûru müvekkilât-ı mezbûrât yedlerinden bi’t-tamam ahz u kabz eyledim, baʻde’l-yevm zevcim müteveffâ-i mezbûrun terekesine müte‘allika âmme-i mîrâs da‘vâsından müvekkilât-ı mezbûrât Havvâ ve Hafize ve Fâtıma nâm hatunların zimmetlerini bi’l-verâse ibrâ-i âmm-ı kātıʻu’n-nizâ‘la ibrâ ve ıskāt edip vechen mine’l-vücûh ve sebeben mine’l-esbâb husûs-ı mîrâsa müte‘allika katʻâ da‘vâ ve nizâ‘ım yokdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 22 Zilhicce sene 1158 Şuhûdü’l-hâl: Eş-Şâhidûnü’s-sâbıkūn.