Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 252 Hüküm no: 202 Orijinal metin no: [50b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasko v. Kika’nın Panko v. Miho’yu işlerine bakmak üzere vekil tayin etmesi Havâss-ı Refîʻa kazâsına tâbi‘ Litros karyesinde mütemekkin Kasko v. Kika nâm zimmî meclis-i şer‘-i şerîf-i enverde işbu râfiʻü’s-sifr Panko v. Miho nâm zimmî muvâcehesinde ikrâr-ı tâm ve takrîr-i kelâm edip vilâyetime gitmek murâdım olup sâlifü’z-zikr Litros karyesinde vâki‘ dükkânımda olan eşyâmı ve zimem-i nâsda olan hukūkumu ahz u kabz zabt u hıfza ve cemî‘ umûru rü’yete tarafımdan mezbûr Panko zimmîyi vekîl ve nâib-i menâb nasb u ta‘yîn eylediğimde ol dahi ber-vech-i muharrer vekâlet-i mezbûreyi muvâcehesinde baʻde’l-kabûl ve hizmet-i lâzımesin kemâ-yenbagī edâya taʻahhüd ve iltizâm etmeğin mâ-vaka‘a bi’t-taleb ketb olundu. Fi’l-yevmi’l-hâmis ve’l-ışrîn min-Zilhicce sene semân ve hamsîn ve mi’e ve elf. Şuhûdü’l-hâl: Mollâ Ali b. Mustafa, Lütfullah Beşe b. Mehmed, Ahmed Beşe b. Mehmed, es-Seyyid Mehmed b. es-Seyyid Mustafa, es-Seyyid Ahmed b. es-Seyyid Mehmed. Yorgo v. Angeli, Yorgo v. Yani, Angeli v. Manu, Panko v. Toto, Kika v. Hıristo, Miço v. Körko, Yani v. Todori.