Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 253 Hüküm no: 203 Orijinal metin no: [51a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Asılarak ölen Zano v. Tanaş’ın terekesinin Premedi kazasındaki vârislerine ulaştırmak üzere Kika v. Yani’nin vasi tayin edilmesi Havâss-ı Refîʻa kazâsına tâbi‘ Litros karyesinde mütemekkin iken bundan akdem maslûben hâlik olan Zano v. Tanaş zimmînin vilâyet-i Rumeli’nde Avlonya sancağında Premedi kazâsına tâbi‘ Barmas? karyesinde mütemekkine zevce-i metrûkesi Oliv? bt. Yano nâm Nasrâniye ile sulbî sagīr oğlu Zato ve sulbiye kızları Sano ve Sotine’nin hisse-i irsiyyelerini ahz u kabz zabt u hıfza ve kendülere îsâle kıbel-i şer‘den bir vasî ve kayyım nasbı lâzım ve mühim olmağın emânet ile ma‘rûf ve her vechile vesâyet uhdesinden gelmeğe kādir idiği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olan işbu râfiʻü’s-sifr Kika v. Yani nâm zimmîyi hâkim-i muvakki‘-ı sadr-ı kitâb tûbâ-lehû ve hüsnü-meâb efendi hazretleri mezbûrûnun hisse-i irsiyyelerini ahz u kabz zabt u hıfza ve kendülere îsâle vasî ve kayyım nasb u ta‘yîn buyurduklarında ol dahi ber-vech-i muharrer vesâyet-i mezbûreyi kabûl ve hizmet-i lâzımelerini kemâ-yenbagī edâya taʻahhüd ve iltizâm etmeğin mâ-vaka‘a bi’t-taleb ketb olundu. Fi’l-yevmi’s-sânî aşer min-Muharremi’l-harâm li-sene tisʻa ve hamsîn ve mi’e ve elf. Şuhûdü’l-hâl: Bostancıbaşı Ağa hazretlerinin çukadârı Ali Ağa, el-Hâc Hasan Haseki b. Mustafa, İsmail Haseki b. Mehmed, Ali Usta b. Ahmed, Bölükbaşı Mustafa Ağa b. Hasan, Yusuf Bey. Panko v. Zato, Kosta v. Hıristo, Nikola v. Hıristo, Fanos v. Angeli, Kostalari v. Dimitri.