Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 263 Hüküm no: 213 Orijinal metin no: [53a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kika v. Dimitri’nin vârisi ve oğlu olan Dimitri’nin, babasının hayatta iken ortak olduğu Bakkal Viko’daki alacağını tahsil etmek istemesi Husûs-ı âti’l-beyânın mahallinde istimâ‘ ve tahrîri için savb-ı şer‘-i enverden Mevlânâ Ahmed Efendi b. Mustafa Efendi irsâl olunup ol dahi Havâss-ı Refîʻa kazâsına tâbi‘ Litros karyesinde mütemekkin Franko nâm Nasrâniye’nin mütemekkine olduğu menzile varıp zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî ettikde karye-i mezbûrede mütemekkin iken bundan akdem hâlik olan Kika v. Dimitri’nin verâseti vilâyet-i Rumeli’nde Ohri kazâsına tâbi‘ Planiçe nâm karyede zevce-i metrûkesi Bişo bt. Yuvan nâm Nasrâniye ile sulbî kebîr oğlu Dimitri nâm zimmîye münhasıra olduğu şer‘an zâhir ve müteʻayyin oldukdan sonra mesfûre Bişo nâm Nasrâniye’nin hisse-i irsiyyesini ahz u kabz zabt u hıfza kıbel-i şer‘den vasî ve kayyım nasb olunan işbu râfiʻü’s-sifr oğlu mesfûr Dimitri nâm zimmî meclis-i ma‘kūd-ı mezkûrda karye-i mezbûrda mütemekkin Bakkāl Viko v. Artin nâm zimmî muvâcehesinde bi’l-verâse ve bi’l-vesâye üzerine da‘vâ ve takrîr-i kelâm edip babam hâlik-i mesfûr Kika v. Dimitri v. Andon nâm zimmî ile hayâtında işbu mesfûr Viko zimmî bakkāllık sanʻatında bir sene mukaddem şerîkler olup hatta helâkinden üç ay mukaddem Nasârâ muvâcehesinde fesh-i şirket edip mâl-ı şirketden mesfûr Viko zimmî zimmetinde babam hâlik-i mesfûrun altı bin akçe hakkı bâkī kalmağla meblağ-ı mezbûru bi’l-verâse ve bi’l-vesâye taleb ederim, suâl olunsun dedikde gıbbe’s-suâl ve’l-inkâr müdde‘î-i mezbûrdan müddeʻâsını mübeyyine beyyine taleb olundukda udûl-ı ahrâr-ı ricâl-i Nasârâ’dan olup karye-i mezbûrda mütemekkin Pandol v. Dimitri ve Zafir v. Foti ve Yorgo v. Todori nâm zimmîler li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka hâlik-i mesfûr Kika v. Dimitri v. Andon nâm zimmî ile hayâtında işbu mesfûr Viko zimmî bakkāllık sanʻatında bir sene mukaddem şerîkler olup hatta helâkinden üç ay mukaddem huzûrunda fesh-i şirket edip mâl-ı şirketden mesfûr Viko zimmî zimmetinde işbu müdde‘î-i mezbûrun babası hâlik-i mesfûrun altı bin akçe hakkı bâkī kalmışdır, biz bu husûsa bu vech üzere şâhidleriz, [53b] şehâdet dahi ederiz deyü herbiri edâ-yı şehâdet-i şer‘iyye eylediklerinde ba‘de riʻâyeti şerâiti’l-kabûl şehâdetleri makbûle olmağın mûcebiyle meblağ-ı mezbûru mesfûr Dimitri zimmîye edâ ve teslîme merkūm Viko zimmîye tenbîh-birle vâki‘ hâli mevlânâ-yı mezbûr mahallinde ketb u tahrîr, ba‘dehû ma‘an ba‘s olunan Çukadâr Ahmed Ağa ve Muhzır es-Seyyid Mehmed ile meclis-i şer‘a gelip herbiri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’l-hâmis aşer min-Muharremi’l-harâm li-sene tisʻa ve hamsîn ve mi’e ve elf. Şuhûdü’l-hâl: Ali Usta b. Ahmed, Bölükbaşı b. Mustafa, Bostanî Mehmed b. Mustafa, Ustazâde Mehmed b. Ahmed, Yusuf Bey, Ali Ağa b. Ali. İlya v. Goryo, Manol v. Ralu?.