Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 266 Hüküm no: 216 Orijinal metin no: [54a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hayatta iken Bahçıvan Kirkor tarafından vasi tayin edilen oğlu İşbo’nun, babasının Aleksi’deki alacağını tahsil etmek istemesi Husûs-ı âti’l-beyânın mahallinde istimâ‘ ve tahrîri için savb-ı şer‘-i enverden Mevlânâ Ahmed Efendi b. Mustafa Efendi irsâl olunup ol dahi medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Topkapısı hâricinde vâki‘ Kara Mustafa Paşa Bağçesi demekle ma‘rûf bağçeye varıp zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî ettikde bağçe-i mezbûrede mütemekkin iken bundan akdem hâlik olan Bağçevân Kirkor v. Nikola nâm zimmînin sulbî kebîr oğlu ve ber-vech-i âtî vasiyy-i muhtârı olduğunu iddiʻâ eden işbu râfiʻü’s-sifr İşbo nâm zimmî meclis-i ma‘kūd-ı mezkûrda hâlik-i mezbûrun meydûnu Aleksi v. Lefter nâm zimmî muvâcehesinde üzerine da‘vâ ve takrîr-i kelâm edip babam hâlik-i mezbûr Kirkor v. Nikola v. Hıristo nâm bağçevân ben bi-emri’llâhi te‘âlâ helâk olduğumda mecmû‘-ı terekem ve zimem-i nâsda olan hukūkum ahz u kabz olunup kadr-i ma‘rûf akçe ile lâşem zîr-i hâke ilkā-i hafr için harc u sarf oluna ve bâkī kalan terekemden vilâyet-i Rumeli’nde Premedi kazâsına tâbi‘ Ogodinin karyesinde mütemekkine zevcem Göle? bt. Hıristo nâm Nasrâniye’nin sümün hissesi îsâl oluna ve bâkī terekem dahi benim ile karındaşlarım işbu hâzır bi’l-meclis Nikola ve Gercisi nâm zimmîler ale’s-seviyye beynlerinde taksîm eyleye deyü vasiyyet ve tenfîzine Nasârâ muvâcehesinde beni vasiyy-i muhtâr nasb u ta‘yîn ve yedime dahi hüccet-i şer‘iyye i‘tâ edip ben dahi ber-vech-i muharrer vesâyet-i mezbûreyi muvâcehesinde baʻde’l-kabûl babam mesfûr bağçevân Kirkor musırran alâ-îsâʼihî hâlik olmağla medyûn-ı mesfûr Aleksi nâm zimmî zimmetinde bogası tohumu bahâsından altı yüz akçe ve lahana tohumu bahâsından iki yüz akçe ve şalgam tohumu bahâsından iki yüz akçe ki min-haysü’l-mecmû‘ babam hâlik-i mezbûrun bin akçe hakkı olup meblağ-ı mezbûru defter-i kassâma bi’l-verâse ve bi’l-vesâye idhâl murâd ederim, suâl olunsun, alıverilmesi matlûbumdur dedikde gıbbe’s-suâl meydûn-ı mesfûr Aleksi hayâtında sâlifü’z-zikr bogası ve lahana ve şalgam bahâlarından meblağ-ı mezbûr ol kadar akçe hâlik-i mezbûra zimmetinde edâsı lâzım deyni olduğunu ikrâr, lâkin taleb olundukda udûl-ı ricâl-i Nasârâ’dan olup sâlifü’z-zikr karye-i mezbûr ahâlîlerinden olup Kara Hasanoğlu Bağçesi’nde mütemekkin Biço v. Simo ve Mirahor Bostanı’nda mütemekkin Bağçevân Hıristo v. Simo ve Mitro v. Mihal ve Saraki v. Nikola nâm zimmîler li-ecli’ş-şehâde meclis-i ma‘kūd-ı mezkûra hâzirûn olup isre’l-istişhâd fi’l-hakīka hâlik-i mesfûr Bağçevân Kirkor v. Nikola v. Hıristo nâm zimmî ben bi-emri’llâhi te‘âlâ hâlik olduğumda mecmû‘-ı terekem ve zimem-i nâsda olan hukūkum ahz u kabz olunup kadr-i ma‘rûf akçe ile lâşem zîr-i hâke ilkā-i hafr için harc u sarf oluna ve bâkī kalan terekemden vilâyet-i Rumeli’nde Premedi kazâsına tâbi‘ Ogodinin karyesinde mütemekkine Göle? bt. Hıristo nâm Nasrâniye’nin sümün hissesi îsâl oluna ve bâkī terekem dahi oğullarım mesfûrûn İşbo ve Nikola ve Gercisi nâm zimmîler ale’s-seviyye beynlerinde taksîm eyleye deyü bizim muvâcehemizde vasiyyet ve tenfîzine işbu oğlu müdde‘î-i mesfûr İşbo zimmîyi vasiyy-i muhtâr nasb u ta‘yîn ve yedine dahi hüccet-i şer‘iyye i‘tâ edip ol dahi ber-vech-i muharrer vesâyet-i mezbûreyi muvâcehesinde baʻde’l-kabûl mesfûr Bağçevân Kirkor musırran alâ-îsâʼihî hâlik olup verâseti zevce-i metrûkesi mesfûre Göle? bt. Hıristo nâm Nasrâniye ile oğulları mesfûrûn İşbo ve Nikola ve Gercisi nâm zimmîlere münhasıra olup hâlik-i mezbûrun sulbî kebîr oğullarıdır, bunlardan gayrı vâris ve terekesine müstahikk-ı âhar olduğu ma‘lûmumuz değildir, biz bu husûsa bu vech üzere şâhidleriz, şehâdet dahi ederiz deyü herbiri edâ-yı şehâdet-i şer‘iyye eylediklerinde ba‘de riʻâyeti şerâiti’l-kabûl şehâdetleri makbûle olmağın mûcebiyle baʻde’l-hükm vâki‘ hâli mevlânâ-yı mezbûr mahallinde ketb u tahrîr ba‘dehû ma‘an ba‘s olunan Çukadâr Ahmed Ağa ve Muhzır Halil Çelebi ile meclis-i şer‘a gelip herbiri alâ-vukū‘ihî inhâ ve takrîr etmeğin hükm-i mezbûr tenfîz olunmağın mâ-hüve’l-vâki‘ bi’t-taleb ketb olundu. Fi’l-yevmi’s-sânî ve’l-ışrîn min-Muharremi’l-harâm li-sene tisʻa ve hamsîn ve mi’e ve elf. Şuhûdü’l-hâl: Bağçevânlar Kethüdâsı Ahmed Ağa, Ali Ağa b. el-Hâc Mehmed, Mehmed Ağa b. el-Hâc İbrahim, İbrahim b. Mustafa, Ali Beşe b. İbrahim, Mustafa b. İbrahim. Sava v. Kostantin, Panova v. Marko.