Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 268 Hüküm no: 217 Orijinal metin no: [54b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Beşe’nin vefâtıyla çocuklarına vasi tayin edilen Ali Beşe’nin görülen muhasebesi Havâss-ı Refîʻa kazâsına tâbi‘ Halkalı karyesinde sâkin iken bundan akdem vefât eden İbrahim Beşe b. Hasan’ın sulbî sagīr oğlu Hüseyin ile sulbiye sagīre kızı Fâtıma’nın ammileri ve tesviye-i emirlerine bâ-hüccet-i şer‘iyye vasiyy-i muhtârları olan Ali Beşe b. Hüseyin’nin bin yüz elli altı senesi Zilkaʻde gurresinden bin yüz elli sekiz senesi Zilhicceti’ş-şerîfesi gāyetine gelince vasiyy-i mezbûrun yirmi altı ayda görülen muhâsebesi defteridir ki ber-vech-i âtî zikr olunur. Fi’l-yevmi’t-tâsiʻ ve’l-ışrîn min-Muharremi’l-harâm li-sene tisʻa ve hamsîn ve mi’e ve elf. Ber-mûceb-i defter-i Muhâsebe-i Evvel bir yük elli beş bin dört yüz yirmi altı akçeden sagīrân-ı mezbûrân Hüseyin ve Fâtıma’nın hisselerinden vasiyy-i mezbûrun makbûzu: 116.564 meblağ. Yalnız bir yük on altı bin beş yüz altmış dört akçedir. Minhâ el-ihrâcât: Sagīrân-ı mezbûrânın yirmi altı ayda nafaka-i mefrûzalarına vasiyy-i mezbûrun masrûfu 24.960 akçe Harc-ı defter-i muhâsebe 1.260 akçe Kalemiye 300 akçe Hüddâmiye 120 akçe Kaydiye-i defter 30 akçe Sagīrân-ı mezbûrânın îd-i şerîflerde baʻzı mesârifleri için vasiyy-i mezbûrun masrûfu 720 akçe Cem‘an yekûn: 27.390 akçe. Yalnız yirmi yedi bin üç yüz doksan akçedir. Sahhe’l-bâkī bi-yedi’l-vasiyyü’l-mezbûr: 89.174 meblağ. Vasiyy-i mezbûr Ali Beşe’nin muhâsebesi görülüp sahhe’l-bâkī ancak zimmetinde yalnız seksen dokuz bin yüz yetmiş dört akçe bâkī kaldığı işbu mahalle şerh verildi.